Ասկերանի սոցիալական ծառայության տարածքային գործակալությունը, գործելով ԱՀ-ում  իրականացվող սոցիալական բարեփոխումներ իրականացնելու ծրագրի շրջանակներում ձեռնարկում է բոլոր միջոցները՝ հատկացված նյութական և ֆինանսական միջոցները սահմանված ժամկետներում իրենց հասցեատերերին հասցնելու ուղղությամբ:

Բնակչության սոցիալական ոլորտում հիմնախնդիրները լուծվում են սոցիալական ծրագրերի  շրջանակներում և ֆինանսավորում պետական բյուջեի միջոցներով:

Ինչպես տեղեկացանք սոցիալական ծառայության Ասկերանի տարածքային գործակալության պետ Էվելինա Աղաջանյանից  2019 թվականի 1-ին կիսամյակում Ասկերանի սոցիալական ծառայության տարածքային գործակալությունում ծախսվել է ավելի քան 174 մլն. դրամ:

Նշված ժամանակահատվածում  տարածքային  գործակալություն մուտքագրվել են քաղաքացիների տարաբնույթ դիմումներ, որոնց գերակշիռ մասը վերաբերում է նպաստների նշանակմանն ու վերանշանակմանը, ծնելիության  բազմազավակության խթանման ծրագրով նախատեսված միջոցների, բարեգործական և ֆինանսական օգնության տրամադրմանը:

Ընթացիկ տարվա 1-ին կիսամյակում շրջանում ծնված 136 երեխայի համար  նշանակվել է  26 մլն. 700 հազար դրամ գումարի չափով ծննդյան միանվագ նպաստ: Շրջանում 1015 ընտանիքների երեխաների ամենամսյա պետական նպաստը կազմել է ավելի քան 128 մլն. դրամ ։

ԱՀ  կառավարության  համապատասխան որոշման համաձայն  շրջանի 29 ընտանիքներում ծնված 3-րդ և յուրաքանչյուր հաջորդ  երեխայի համար նշանակվել է չափահասության նպաստ:    Ընթացքի մեջ է 18 տարեկանը լրացած ավանդատերերի ավանդների տրամադրման գործընթացը, 40 ավանդատեր արդեն ստացել հասանելիք իր ավանդը:

Նշված ժամանակահատվածում գործակալություն դիմած 48 քաղաքացիների համար ստեղծվել են  անձնական գործեր` ամուսնության միանվագ նպաստ հատկացնելու համար, որը կազմել է 7 մլն. 200 հազար դրամ :

Տոն և հիշարժան  օրերի կապակցությամբ բնակչության սոցիալական խմբերին պատկանող 562  քաղաքացիների վճարվել է 9 մլն. 312 հազար դրամ միանվագ օգնություն:

ԱՀ պաշտպանության ժամանակ զոհված 2 և ավելի զոհ ունեցող 8 ընտանիքների ամսական հատկացված օժանդակությունը կազմել է 1մլն. 440 հազար դրամ: Ծառայության ընթացքում զոհված 2 զինծառայողի ընտանիքի տրամադրվել է 1մլն. 400 հազար դրամի չափով միանվագ օգնություն:

Պետական միջոցների հաշվին ձեռք բերված առողջարանային բուժման 49 ուղեգիր հատկացվել է սոցիալական ծառայության տարածքային գործակալությանը՝ Արզնի, Ջերմուկ, Կարմիր խաչ առողջարանային տներում հանգստանալու նպատակով։ Ուղեգրերից 8-ը տրամադրվել  է  զոհված զինծառայողների  ընտանիքներին, 2-ը` հաշմանդամներին, 7-ը` ընդհանուր հիվանդության հաշմանդամներին, իսկ 1-ը` ՀՄՊ  հաշմանդամին հավասարեցված քաղաքացու: Գործընթացը ընթացքի մեջ է։

Շրջանի 161 հաշմանդամների համար ստեղծված անձնական գործերի հիման վրա ցուցաբերվել է էլեկտրաէներգիայի և բնական գազի դիմաց պետական ֆինանսական աջակցություն, իսկ հաշմանդամության կենսաթոշակ ստացող 2 քաղաքացիների տրամադրվել է պրոթեզաօրթոպեդիկ պարագա` թիկնասայլակ:

Բացի ֆինանսական աջակցությունից գործակալությունը  շրջանի 168 բազմազավակ ընտանիքների տրամադրել է նաև բնաիրային օգնություն:

Ինչպես նշեց տիկին Աղաջանյանը  պետության կողմից ազգաբնակչության սոցիալական կարիքների բարելավմանն ուղղված ֆինանսական  և այլ միջոցները հսկայածավալ են, ինչը վստահություն է ներշնչում, որ  մոտ ապագայում կփոխվի հասարակության սոցիալական ապահովվածության դիմանկարը և կնշմարվեն ոլորտի ապագա զարգացման հեռանկարները:

Անահիտ ՊԵՏՐՈՍՅԱՆ