Այսօր Ասկերանի քաղաքային մարզադաշտում մեկնարկեցին համահայկական 7-րդ  ամառային խաղերը։ Ըստ խաղերի գրաֆիկի Ասկերանի մարզադաշում անցկացվելու է ֆուտբոլային չորս հանդիպում։

Մինչ թիմերը պատրաստվում էին անդրանիկ խաղին՝ համերգային ծրագրով հանդես եկան Ասկերանի Բերդ համույթն ու Արվեստի դպրոցի սաները։ Նրանց ազգային երգն ու նվագը տոնական տրամադրություն հաղորդեցին միջոցառման մասնակիցներին։

Համահայկական 7-րդ խաղերի մեկնարկի կապակցությամբ ողջույնի խոսք հղեց Ասկերանի շրջանի

վարչակազմի ղեկավար Հակոբ Ղահրամանյանը։ Կարևորելով խաղերի անցկացումն Արցախում վարչակազմի ղեկավարը նշեց, որ այն մեկ անգամ ևս վկայում է Հայաստան-Արցախ-Սփյուռք եռամիասնությունը։ Դրանք ոչ միայն զուտ մրցումներ են, այլև մեր ժողովրդի համերաշխության ու միասնականության իրական ապացույցն ու դրսևորումը։ Մարզիկներին մաղթելով մարզական հաջողություններ և մարտական բարձր ոգի՝ նա համոզմունք հայտնեց, որ հայրենիքի միավորող ոգին և մարզական արդար մրցակցությունը նոր ու հզոր լիցքեր կհաղորդեն բոլորիս։

7-րդ hամահայկական մարզական խաղերի արցախյան ենթախմբի առաջին խաղը Ստեփանակերտի և համայն հայության հոգևոր մայրաքաղաք Էջմիածնի ֆուտբոլային թիմերի միջև էր։

Թիմերը մարզադաշտ դուրս եկան փոքրիկ ասկերանցիների ուղեկցությամբ։ Հնչեց համահայկական խաղերի օրհներգը։

Խաղն ընթացավ բավականին թեժ և ակտիվ մթնոլորտում։ Գրոհները հաջորդում էին մեկը մյուսին։ Աստիճանաբար նախաձեռնությունն անցավ Ստեփանակերտիցների կողմը, ինչի արդյունքում 11-րդ րոպեին բացվեց խաղի հաշիվը։ Գոլի հեղինակ դարձավ 7 համարի խաղացող Մհեր Մկրտումյանը։ Հաջորդ 20 րոպեներն անցան հիմնականում ստեփանակերտցիների առավելությամբ։ Պայքարն ավելի կոշտ ընթացք ստացավ, ինչի արդյունքում մրցավարը ստիպված էր 2 դեղին քարտ ցույց տալ։31-րդ րոպեին ստեփանակերտցիները կրկնապատկեցին հաշիվը, գոլը խփեց 15 համարի ֆուտբոլիստ Սարգիս Մաթոյանը։ Առաջին խաղակեսն ավարտվեց 2։0 հաշվով։ Երկրորդ խաղակեսի 47-րդ և 66-րդ րոպեներին Սարգիս Մաթոյանը ևս երկու գոլ խփեց՝ դառնալով հեթ-տրիկի հեղինակ, իսկ 59-րդ րոպեին Ստեփանակերտի խաղացող Արսեն Սարգսյանը ոչ սպորտային պահվածքի պատճեցառով հեռացվեց խաղադաշտից։

Խաղի 69-րդ րոպեին Էջմիածնի 13 համարի ֆուտբոլիստ Արամ Գևորգյանը մեկ պատասխան գնդակ ուղարկեց մրցակցի դարպասը՝ խաղի հաշիվը դարձնելով 4։1։ Խաղի հիմնական ժամանակին մրցավարի ավելացրած 2-րդ րոպեին ստեփանակերտցի Ռաֆիկ Շաքարյանը ևս մեկ գնդակ ուղարկելով մրցակցի դարպասը՝ ձևակերպեց խաղի վերջնահաշիվը՝ 5։1։

Հարազատ թիմի խաղը դիտելու և մարզիկներին ոգևորելու էր եկել Էջմիածնի քաղաքապետ Դիանա Գասպարյանը։ Մեզ հետ զրույցի ժամանակ նա կարևորել է համահայկական խաղերի դերն ու նշանակությունն աշխարհասփյուռ հայության համար։  Այն գեղեցիկ սպորտային տոն լինելուց բացի մեկ անգամ ևս մեր միասնականությունն ու համախմբվածությունն է ի ցույց դնում աշխարհին։ Էջմիածինցիները տարբեր մազաձևերում են հանդես գալու համահայկական խաղերին։ Քաղաքապետը հույս հայտնեց, որ մարզիկները կկարողանան արժանվույնս հանդես գալ համազգային մարզական մրցումներում և բարձր ցուցանիշներ կապահովեն։ 

Այն իրողությունը, որ 7-րդ համահայկական խաղերի քաղաքների աշխարհագրությունն ու մասնակիցների թիվը նախորդ տարիների համեմատ աննախադեպ աճ է արձանագրել, վկայում է այն մասին, որ նախագիծը շուրջ երկու տասնյակ տարիների ընթացքում ոչ միայն կայացել է, այլեւ կատարում է կարեւոր առաքելություն՝ նպաստելով մեր երկրի մարզական կյանքի ակտիվացմանը, աշխարհով մեկ սփռված մեր հայրենակիցների միջեւ ամուր և հարազատական կապերի հաստատմանը, ամրապնդմանն ու զարգացմանը, ինչպես նաև Արցախի տնտեսության զարգացման համար նոր հնարավորությունների ստեղծմանը:

Տեղեկացնենք նաև, որ այսօր Ասկերանի մարզադաշտում կկայանա ևս մեկ հանդիպում։ Ժամը 15-ին կհանդիպեն Արտաշատի և Տագանրոգի ֆուտբոլային թիմերը։

Անահիտ ՊԵՏՐՈՍՅԱՆ

Լուսանկարները՝ ՎԱԼԵՐԻ ՊԵՏՐՈՍՅԱՆԻ