Արցախն ագրարային երկիր է և հանրապետությունում բազմաթիվ ծրագրեր են կյանքի կոչվում անասնապահության և բուսաբուծության խթանման ուղղությամբ։  Մեր շրջանում Ակնա թաղամասում են իրականացվում մեծածավալ անասնապահական և բուսաբուծական աշխատանքներ։ Ասել է թե, այստեղ գյուղատնտեսությամբ զբաղվողները բավականին հմտացել են իրենց աշխատանքներում և ամեն տարի ջանում են ավելի բարձր նշաձող դնել և հասնել։ Սակայն վերջին ժամանակներս այստեղ հողագործությամբ և անասնապահությամբ զբաղվողների միջև դժգոհության ալիք էր բարձրացել։ Պատճառն անասունների ազատ մուտքն է դաշտեր։ Մի կողմը ենթադրում է, որ անասնապահն է մեղավոր, որ անասունը փակի տակ չի պահում, մյուս կողմը մեղադրում է հողագործին՝ սեփական տարածքների սահմանները չցանկապատելու մեջ։ Խնդիրն այնքան էր հասունացել, որ վարչակազմի ղեկավար Հակոբ Ղահրամանյանի հանձնարարականով ղեկավարի տեղակալ Վլադիմիր Բալասանյանը՝ շրջանի իրավապահ, օրինապահ  և շահագրգիռ այլ մարմինների մասնակցությամբ անցկացրեց խորհրդակցություն՝ առկա խնդիրներին տեղում ծանոթանալու, երկու կողմերի դժգոհություններն ու առաջարկությունները լսելու՝ մոտ ապագայում խնդրի լուծման ուղղությամբ որոշում կայացնելու համար։

Խորհրդակցությանը մասնակցում էին շրջանի դատախազ Էրիկ Վերդյանը, ոստիկանապետի տեղակալ Սերգեյ Ենգիբարյանը, վարչակազմի աշխատակազմի գյուղբաժնի վարիչ Արվիդ Ղուլյանը, անասնաբուժական կայանի տնօրեն Արթուր Ենգիբարյանը, թաղամասի լիազոր ներկայացուցիչ Արմեն Հարությունյանը, շահագրգիռ այլ անձինք։

Ողջունելով Ակնայի տարածքում գործունեության իրականացնող հողագործներին և անասնապահներին Վ. Բալասանյանը հույս հայտնեց, որ խնդրո առարկա հարցերն ու դժգոհությունները հանգիստ մթնոլորտում քննարկելու և բոլոր կողմերի համար ընդունելի ելք գտնելու համար յուրաքանչյուր ոք պատրաստակամ է։

Երկու կողմերն էլ ներկայացրեցին իրենց դժգոհությունները, որոնք հաճախ վերածվում էին փոխադարձ վիրավորանքների։ Հարաբերությունների սրացումից զերծ մնալու համար գյուղաբաժնի վարիչ Ա. Ղուլյանը հաճախ էր միջամտում, ակնկալելով ստեղծված իրավիճակից ճիշտ երք գտնելու համար առաջարկներ լսել հենց մենատնտեսներից։

-Ցավալին այն է, որ օրենքով սահմանված որևէ լուրջ պատժամիջոց չկա նման իրավախախտումների դեպքում, ինչն ավելի է բարդացնում մեր աշխատանքը։ Ամեն դեպքում մարդկային գործոնի հետ է կապված խնդիրը։ Լսել ենք երկու կողմերի երկուստեք մեղադրանքները, սակայն այդպես էլ առաջարկություններ չեն հնչեցվել։  Պատճառները բազմաթիվ ու բազմապիսի են, և երկու կողմերին էլ կարելի է հասկանալ։ Սակայն ստեղծված իրավիճակում անհապաղ ելք գտնելը օրակարգային է,- նշեց Ա. Ղուլյանը, հավելելով, որ վարչակազմի ղեկավար Հակոբ Ղահրամանյանի հանձնարարականով մոտ օրերս նշված հարցի ուղղությամբ որոշում կամ կարգադրություն կկայացվի, որը կուղարկվի շահագրգիռ բոլոր մարմիններին և անձանց։

Անահիտ Պետրոսյան