Պետությունը՝ մտահոգված լինելով իր բնակիչների կենսամակարդակի բարձրացման և անվտանգության ապահովման խնդիրներով, հարկային համակարգի միջոցով դրամական միջոցները հավաքագրում և կենտրոնացնում է պետական բյուջեում:   Պետք է գիտակցել, որ հարկերը ոչ միայն պետության եկամուտների գոյացման աղբյուր են, այլև նպաստում են արտադրության ճյուղերի զարգացմանը, երկրի տնտեսական աճին, դրանց կայունացմանը։ Ու ինչքան զարգացած է երկիրը, այնքան ճկուն է գործում հարկային

դաշտը։ Քանզի իրազեկ յուրաքանչյուր քաղաքացի հստակ գիտի, որ իր պետության տնտեսական, ռազմական, արտադրական զարգացվածությունը կախված է յուրաքանչյուրիս խելամիտ, պարտաճանաչ և օրինապահ գործունեությունից։

Ասկերանի շրջանի հարկային տեսչությունում ի մի են բերվում 2019 թվականի ցուցանիշները։ Ըստ տեսչության պետ Մարատ Հայրապետյանի, ինչպես նախորդ տարին, 2019-ը ևս եզրափակելու են սահմանվածից բարձր ցուցանիշներով։ Ինչը, մեր խորին համոզմամբ, ինչպես կուռ և միասնական կոլեկտիվի գործիմաց անդամների նվիրված և պարտաճանաչ աշխատանքի, այնպես էլ հարկատուների և  ԱՀ ֆինանսների նախարարության կենտրոնական ապարատի հետ սերտ փոխհամագործակցության արդյունք է։

- 2019 թվականի 11 ամսվա կտրվածքով պլան - առաջադրանքները գերակատարվել են բոլոր հարկատեսակների գծով՝ կազմելով 104.5%, այսինքն նախատեսվածից ավել է մուտքագրվել 34 միլիոն 650 հազար դրամ, նախորդ տարվա նույն ժամանակահատվածի՝ 103.3% կամ 25 միլիոն 811 հազար դրամի փոխարեն։ Համոզված կարելի է արձանագրել, որ դեկտեմբեր ամսվա նախատեսված պլանը ևս գերակատարելու ենք, - նշում է տեսչության պետը՝ հավելելով, որ Ասկերան քաղաքում և շրջանի բնակավայրերում ՎԳԲ աշխատակիցների հետ կազմակերպվել են անձնական հանդիպումներ՝ առևտրային գործունեություն իրականացնող տնտեսվարող սուբյեկտների հետ, ուղղված իրացման ծավալների, աշխատողների թվաքանակի ու աշխատավարձի ֆոնդի իրական մեծության արտացոլմանը, ինչպես նաև փաստաթղթավորման պահանջների ապահովմանը։

Տեսչությունում պարբերաբար աշխատանքներ են իրականացվում տնտեսվարող սուբյեկտների սպասարկման մակարդակի բարձրացման ուղղությամբ։ Մ. Հայրապետյանի կողմից աշխատակիցների հետ հաճախակի են բացխոսության մթնոլորտում կազմակերպվում խորհրդակցություններ, որտեղ քննարկվում են ամսվա կտրվածքով իրականացված աշխատանքները, օրենսդրական հիմնահարցերը, տեսչության աշխատակիցների կողմից վերահսկողական աշխատանքների իրականացման և հարկ վճարողների սպասարկման աշխատանքների ժամանակ հանրային ծառայողի վարքագծի կանոնների պահպանման, աշխատանքային կարգապահության, ինչպես նաև սպասարկման և վերահսկողական աշխատանքների կատարմանը խոչընդոտող հարցեր։

Ասկերանի հարկային տեսչությունում գրանցված է 1380 հարկատու, որոնցից գործում է 502-ը։ 105 հարկատու հաշվետվությունները ներկայացնում է էլեկտրոնային եղանակով։ Իսկ 31 հարկատու ընթացիկ տարում է ցանկություն հայտնել կամավորության սկզբունքներով անցնել էլեկտրոնային եղանակով հաշվետվությունների ներկայացման։ Վերջիններիս հետ կնքվել են համապատասխան պայմանագրեր։

Ինչպես նշեց Մ. Հայրապետյանը, տեսչություն այցելած յուրաքանչյուր հարկ վճարողի պարզաբանվում են հարկերի և այլ վճարների կարգի և օրենսդրական ակտերի կիրառման հետ կապված հարցերը։ Ընթացիկ տարում տեսչության պետը կազմակերպել է 542 ընդունելություն, որոնց ժամանակ անկողմնակալորեն քննության են առնվել հարկ վճարողների առաջարկությունները և բարձրացված հարցերին տրվել համապատասխան պարզաբանումներ։ Անհատական այսպիսի մոտեցումը մեծապես նպաստում է հարկատուի իրավագիտակցության բարձրացմանը, ինչպես նաև օրենքի շրջանակներում գործելուն։

Արդեն մի քանի տարի է, ինչ մեր հանրապետությունում՝ ֆինանսների նախարարի համապատասխան որոշման համաձայն, օրինապահ հարկ վճարողները խրախուսվում են։ Ինչն արդեն բարի ավանդույթ է դարձել։

Ինչպես պարզաբանում է Ասկերանի ՇՀՏ սպասարկման, տվյալների մշակման և հաշվառման բաժնի պետ Ստելլա Մինասյանը՝ խրախուսման են ներկայացվում այն հարկատուները, ովքեր օրենքով սահմանված ժամկետներում և կարգով ներկայացնում են հարկային հաշվարկները, ինչպես նաև կատարում հարկային պարտավորությունները։

Սկսած 2017 թվականից մեր շրջանի 20 տնտեսվարող սուբյեկտ արժանացել է օրինապահ հարկ վճարողի պատվաբեր կոչմանը և պարգևատրվել ֆինանսների նախարարի պատվոգրերով և թանկարժեք նվերներով։

Բաժնի աշխատակցուհիները պատրաստակամ են յուրաքանչյուր հարկատուի մեթոդական օգնություն ցուցաբերելուց զատ անել ամեն ինչ, որպեսզի հարկային դաշտն ավելի հասանելի լինի տնտեսվարող սուբյեկտներին։ Քանզի գիտակցում են, որ օժանդակելով նրանց՝ նպաստում են կազմակերպված գործունեություն իրականացնելուն և կայանալուն, ինչն էլ կապահովի ոչ միայն շրջանի, այլև հանրապետության տնտեսական աճը, ուստի և բնակիչների սոցիալ-տնտեսական զարգացվածությունը։

Անել հնարավոր ամեն ինչ, ինչը կնպաստի հարկային դաշտի կայուն և ճկուն գործունեությանը, զերծ կպահի տնտեսվարող սուբյեկտներին և իրավաբանական անձանց սև հաշվարկներ և աշխատողներ պահելու մտադրությունից՝ դրված է տեսչության աշխատակիցների ամենօրյա աշխատանքի հիմքում։

- Անցնող տարին ճանապարհում ենք աշխատանքային հաջողություններով և ոտք դնում հաջորդ տարի` ավելի լավ ակնկալիքներով ու սեփական ուժերի հանդեպ ակնհայտ վստահությամբ, համախմբելով մեր ջանքերն ու կարողությունները: Յուրաքանչյուր Ամանոր նոր մեկնարկի սկիզբ է ազդարարում, ցանկանում ենք, որ այդ մեկնարկը բոլորիս համար լինի հաջողակ ու խոստումնալից: Թո՛ղ գալիք 2020 թվականը երազանքների իրականացման ու սպասումների արդարացման տարի լինի, ամենանվիրական երազանքներն իրականություն դառնան՝ խաղաղ ու անամպ երկնքի տակ,- ասում են աղջիկները՝ լրացնելով մեկը մյուսի մտքերը։

Համախմբվածություն և նվիրվածություն ամենուրեք և ամեն ինչում՝ սա է նրանց նշանաբանը։

Նույն ոգևորությամբ և հարկ վճարողներին ցանկացած հարցում օգտակար լինելու վճռականությամբ և պատրաստակամությամբ է աշխատում վերահսկողության և գանձումների բաժինը։

Մենք գտնվում ենք մի կոլեկտիվում, որտեղ տիրում է առողջ մթնոլորտ, որտեղ յուրաքանչյուր աշխատող ցուցաբերում է խորը իրավագիտակցություն՝ ամենօրյա աշխատանքի հիմքում ունենալով անաչառությունը, առաջնորդվելով արդարության սկզբունքներով, քանի որ գործ ունեն անհատների հետ, որոնց հաջողած գործունեությունից է կախված մեր երկրի տնտեսական աճը։

Խորը համոզմունքով արձանագրում ենք, որ այս ամենը գալիս է տեսչության պետի  արհեստավարժ և սրտացավ վերաբերմունքից։

Ասածս խոսքերն են հաստատում Արմենակավանի համայնքի հաշվապահ Լուսաբեր Պալոյանն ու Նորագյուղի բնակչուհի, անհատ ձեռներեց Ալինա Արզումանյանը, ովքեր իրենց հիացմունքն արտահայտեցին տեսչության բոլոր աշխատողների նկատմամբ։

-Երբ մտնում ես սպասարկման բաժին, իսկույն զմայլվում ես ժպտերես և սիրունատես աղջիկների ջերմ և անմիջական վերաբերմունքից։ Եվ մեր կարծիքով դա գալիս է տեսչության պետ Մարատ Հայրապետյանի բարձր ինտելեկտից, մարդամոտությունից,  ով անչափ համեստ, սրտացավ և բարեհամբույր անձնավորություն է, և մեծ հարգանք է վայելում բոլորիս մոտ,- ակնածանքով իրենց երախտիքն են արտահայտում զրուցակցիներս՝ համոզմունք հայտնելով, որ այս կարծիքը վստահորեն կարող են արտահայտել բազմաթիվ հարկատուների անունից։