Հունվարի 24-ին Նորագյուղի մշակույթի տանը տեղի ունեցավ ինտելեկտուալ խաղ՝ տարբեր սերունդների ներկայացուցիչների մասնակցությամբ։ Կազմակերպիչները գյուղի երիտասարդներն էին, ովքեր համախմբվել էին հարազատ համայնքի զարգացման, բնակիչների համախմբման, երիտասարդների ազատ ժամանցի կազմակերպման հարցերի շուրջ։ Իրոք, գյուղի հոգսերով մտահոգ երիտասարդներ շատ ունի Նորագյուղը։  Ինչպես նշում է մշակույթի տան տնօրեն Լիանա  Հայրիյանը՝ իրենք միշտ պատրաստ են տարաբնույթ

միջոցառումներ կազմակերպելու համար, և Նորագյուղի երիտասարդներն ու դպրոցականներն ակտիվությամբ են մասնակցում կազմակերպվող միջոցառումներին։ Մանավանդ, երբ համայնքի ղեկավարը պատրաստակամություն է հայտնել իր յուրօրինակ աջակցությունը ցուցաբերել այդ միջոցառումներին։ Նորագյուղի մշակույթի տունը բազմիցս է մրցանակային տեղեր զբաղեցրել ինչպես շրջանային, այնպես էլ հանրապետական նշանակության միջոցառումներում։

Չնայած մշակույթի տան պատերը սառն էին, սակայն մթնոլորտն այնտեղ ջերմ էր ու տրամադրող։ Ներկաներին ողջունեց և բարի ժամանց մաղթեց Լիանան՝ շնորհակալություն հայտնելով համայնքի ղեկավարին՝ օրվա միջոցառմանն օժանդակելու համար։ Ինչպես նշեց մշակույթի տան տնօրենը՝ ընթացիկ տարվա առաջին միջոցառումը մեկնարկել է համայնքի ղեկավարի առաջարկով և հովանավորությամբ։ Նա նաև հույս հայտնեց, որ այն շարունակական բնույթ կկրի։

Ընդհանուր առմամբ խաղին մասնակցում էր 5 թիմ՝ 2 դպրոցական  (§Կիլիկիա¦ և §Նշխար¦), 2 երիտասարդական (§Նոր Նորագյուղ¦ և §Ուրարտու¦) և §Արմատներ¦ թիմը, որը  ձևավորվել է համայնքապետարանի աշխատողներից՝ համայնքի ղեկավարի գլխավորությամբ։ Խաղն ընթացավ 3 փուլով, որոնք ընդմիջվում էին դպրոցականների  հայրենասիրական գեղեցիկ և հուզիչ արտասանություններով, նվագով։ Իսկ §Նշխար¦ թիմի անդամները, որի կազմում պարի խմբակի աշակերտներն էին՝ պարուսույց Թամարի գլխավորությամբ, ցուցադրեցին ազգագրական պարերի շարան։

Արդյունքների ամփոփմամբ պարզվեց, որ 1-3-րդ մրցանակային տեղերն իրարից առանձնանում էին 1-ական միավորների տարբերությամբ, ինչն ապացույցն էր այն բանի, որ ինտելեկտուալ խաղն  ընթանում էր համառ ու անզիջում  պայքարում, և, որ դպրոցականներն իրենց բարձր ինտելեկտով չեն զիջում երիտասարդությանը։ Մրցանակային տեղերում էին §Արմատներ¦,  §Կիլիկիա¦ և §Նշխար¦ թիմերը։ Թիմերը պարգևատրվեցին համայնքի ղեկավարի պատվոգրերով։ Իսկ §Արմատներ¦ թիմի անդամները ստացան նաև նվերներ։ Խրախուսկան նվեր ստացան նաև Արեն Աղաջանյանը և Աննա Գալստյանը, ովքեր հանդիսանում են գյուղի ակտիվ երիտասարդներից և իրենց ուրույն մասնակցությունն են ունեցել միջոցառման կայացմանը։ Ի դեպ, Արենի նախաձեռնողականության շնորհիվ գյուղում պարբերաբար սանիտարական մաքրման և ծառատնկման աշխատաքներ են իրականացվում։

Պատվոգրերի և նվերների արժանացան նաև Նարեկ Բաբայանը, ում արտահայտիչ և հուզիչ արտասանություններն ազդեցիկ էին և §Նշխար¦ թիմը՝ գեղեցիկ պարային համարներ ցուցադրելու, դահլիճի ուրախ և աշխույժ մթնոլորտն ապահովելու համար։

Նորագյուղի համայնքի ղեկավար Վլադիմիր Պետրոսյանը շնորհակալություն հայտնեց երիտասարդներին` համախմբվածության և համայնքի զարգացման ծրագրերին պատրաստակամությամբ ինտեգրվելու համար՝ համոզմունք հայտնելով, որ նմանատիպ ծրագրերը շարունակական են լինելու, ինքն էլ անելու է հնարավոր ամեն ինչ, որպեսզի նորագյուղցի երիտասարդը հարազատ համայնքում տեսնի իր ապագան և զգա իրեն այստեղ լիիրավ տեր։ Չէ որ յուրաքանչյուր հասարակության շարժիչ ուժը երիտասարդությունն է։ Մաղթելով նրանց ամուր ոգի, անսպառ եռանդ և անկոտրում կամք նոր գաղափարներ ու մտահղացումներ իրականացնելու ճանապարհին՝ պատրաստակամություն հայտնեց նպաստել սեփական գյուղի և երկրի զարգացմանն ու հզորացմանն ուղղված երիտասարդների բոլոր ձեռնարկումներին։

Անահիտ ՊԵՏՐՈՍՅԱՆ