Ծանր ու անդառնալի կորուստ ունեցան Ասկերանն ու ասկերանցիները։ Կյանքից անժամանակ հեռացավ Ասկերանի քաղաքապետ ՍԱՄՎԵԼ ՄԱՐԴԻԻ ԱՂԱՋԱՆՅԱՆԸ։ Անհատականությունը, ում ապագայի բոլոր ծրագրերը կապված էին հարազատ քաղաքը զարգացած, ապահովված միջազգային չափորոշիչներին համապատասխան բոլոր ենթակառույցներով տեսնել։

Սամվել Մարդիի Աղաջանյանը ծնվել է 1971 թվականի ապրիլի 14-ին Ասկերանում: 1977 թվականին հաճախել է Ասկերանի միջնակարգ դպրոցը և ավարտել այն 1988 թվականին: 1988 թվականի փետրվարի 22-ին, երբ Աղդամից ազերիների հրոսակախումբը հարձակվեց Ասկերանի ուղղությամբ, մասնակցել է Ասկերանի մատույցների պաշտպանությանը:

1988 թվականին ընդունվել է ՀՀ Կիրովականի պոլիտեխնիկական տեխնիկումը և ավերիչ երկրաշարժի ժամանակ մասնակցել  փլատակներում մնացած մարդկանց օգնելու աշխատանքներին:

1988-1990թթ. ծառայել է ԽՍՀՄ ԶՈւ-ում: Ծառայությունն

ավարտելուց հետո ուսումը տեղափոխել է Ստեփանակերտի գյուղատնտեսական տեխնիկումը և միաժամանակ կամավոր ընդգրկվել Ասկերանում գործող ինքնապաշտպանական կամավորական ջոկատում: Այդ ջոկատի կազմում 1992 թվականին մասնակցել է Ասկերանի շրջանի Խրամորթ գյուղի պաշտպանական թեժ մարտերին, որտեղ էլ ծանր վիրավորվել է թնդանոթի ականի պայթյունից՝ վնասելով դեմքն ու կորցնելով զույգ աչքերի տեսողությունը։ Երկու ամիս բուժվելուց և աչքերի տեսողությունը մասամբ վերականգնելուց հետո վերադարձել է Արցախ և շարունակել ծառայությունը նույն ջոկատի կազմում: Մասնակցել է մի շարք բնակավայրերի մարտական գործողություններին:

1992 թվականին նշանակվել է դասակի հրամանատար։  1993 թվականին մասնակցել է Աղդամի կրակակետերի ոչնչացմանը, իսկ հուլիս ամսում նշանակվել ՊԲ 34153 զ/մ-ի 2-րդ գումարտակի շտաբի պետ: Մարտական գործողություններին ակտիվ և խիզախ մասնակցության համար պարգևատրվել է Արցախի Հանրապետության §Արիություն¦, ՀՀ §Մարտական ծառայություն¦, §Մայրական երախտագիտություն¦ և ՊԲ մի շարք գերատեսչական մեդալներով: Պատերազմի 2-րդ կարգի հաշմանդամ է:

2006 թվականից հանդիսանում էր Արցախի ազատամարտիկների միության Ասկերանի տարածքային միավորման խորհուրդի նախագահը: Նա մշտապես ապահովել է ակտիվ համագործակցությունը զորամասերի հետ, կատարել փոխադարձ այցելություններ զորամաս-դիրքեր, վետերան-ազատամարտիկների հետ միասին մասնակցել զորամասում կայանալիք ռազմահայրենասիրական դասընթացներին:

2014 թվականի օգոստոսին նրա անմիջական մասնակցությամբ մի խումբ ազատամարտիկներով իրականացրել են մարտական հերթափոխություն սահմաններում:

2016 թվականի ապրիլյան քառօրյա պատերազմի ժամանակ Ասկերանի շրջանից 1000-ից ավել ազատամարտիկներ Սամվել Աղաջանյանի հրամանատարության ներքո ակտիվ մասնակցել են զորամասի մարտական հենակետերի հերթապահությանն ու հերթափոխերին:

2007 թվականից անդամագրվել է §Ազատ հայրենիք¦ կուսակցության շարքերը՝  հանդիսանելով §Ազատ հայրենիք¦ կուսակցության խորհուրդի անդամ:

2015 թվականին ընտրվել և 2019 թվականին վերընտրվել է Ասկերանի համայնքի ղեկավարի պաշտոնում:

2019թ. նոյեմբերի 14-ին Երևանի Առնո Բաբաջանյանի անվան համերգասրահում կայացած Հայաստան-Արցախ-Սփյուռք համահայկական ամսագրի §Որակի նշան 2019¦ մրցանակաբաշխությանը §ԷՅ-ԷՅ-ԴԻ Փաբլիշինգ¦ ՍՊԸ-ի կողմից §Որակի նշան¦ անվանակարգում պարգևատրվել է Ասկերանի քաղաքապետ Սամվել Աղաջանյանը՝ համայնքի վերաբնակեցման, բարեկարգման և իրականացված մի շարք բարեփոխումների համար։

Ամուսնացած էր, ունի երեք զավակ, մեկ թոռ։

Սամվել Աղաջանյանի հիշատակը միշտ վառ կմնա բոլորիս սրտերում։ Նրա մասին ամեն քայլափոխի կհիշեցնեն նաև կատարված բազմաթիվ շինարարական, բարենորոգման և բարեկարգման աշխատանքները, որոնց ամբողջ հոգով ու սրտով նվիրված է եղել Ասկերանի քաղաքապետը։