Արցախի Հանրապետության աշխատանքի, սոցիալական հարցերի և վերաբնակեցման նախարարության կողմից մեկնարկվել են հանրապետությունում բնակվող միայնակ քաղաքացիներին (63 տարեկան լրացած` չաշխատող, զավակ (այդ թվում` որդեգրված), ամուսին (բացառությամբ ամուսնու` աշխատանքային գործունեությամբ զբաղվելու կարողության 3-րդ աստիճանի սահմանափակում ունենալու դեպքի) և օրենքով սահմանված խնամակալ չունեցող անձանց) մեկ ամսվա պարենամթերքով և հիգիենիկ պարագաներով ապահովման համար աշխատանքները:

Ինչպես մեզ տեղեկացրեց ԱՀ աշխատանքի, սոցիալական հարցերի և վերաբնակեցման նախարարության Ասկերանի սոցիալական ծառայության տարածքային գործակալության  պետ Գարիկ Պետրոսյանը` մեր շրջանում ևս իրականացվել են այդ աշխատանքները:

Շրջանի 63 տարին լրացած չաշխատող միայնակ 44 քաղաքացիներ ստացել են մեկ ամսվա համար պարենամթերք ու հիգիենիկ պարագաներ: Մեկնարկը տրվել է Ասկերան քաղաքից, Ասկերանի սոցիալական ծառայության տարածքային գործակալության աշխատողները քաղաքացիներին ներկայացել են բժշկական դիմակներով ու ձեռնոցներով` պահպանելով սանիտարահիգիենիկ բոլոր կանոնները:

Ինչ խոսք, ճակատագրի բերումով միայնակ մնացած քաղաքացիներն անչափ զգացված էին իրենց հանդեպ դրսևորած մարդասիրական վերաբերմունքից, քանզի նրանցից շատերն ունեն առողջական խնդիրներ և այս օրերին տանից դուրս գալ, կնշանակի` վտանգել իրենց կյանքը: Տատիկներն ու պապիկները միայն մի ցանկություն ունեն. նոր տեսակի կորոնավիրուսը շուտ վերանա և մարդիկ անցնեն իրենց բնականոն կյանքին: Միաժամանակ նրանք գիտակցում են, որ յուրաքանչյուրը պետք է պահպանի ԱՀ առողջապահության նախարարության կողմից տրվող բոլոր հրահանգները և ցուցումները:

Առողջ լինենք…

Կարինե ԲԱԽՇԻՅԱՆ