Ասկերանի շրջանում շարունակվում են նոր կորոնավիրուսի տարածման կանխարգելման աշխատանքները:

Ինչպես մեզ տեղեկացրեց Ասկերանի շրջանային հակահամաճարակային բաժնի պետ Իրադա Խաչատրյանը, շրջանում համաճարաբանական իրավիճակը գտնվում է վերահսկողության տակ:

Նրա հավաստմամբ՝ համայնքներում ախտահանում իրականացնելու նպատակով ձեռքբերված քլորակիրը և ԱՀ առողջապահության նախարարության կողմից տրամադրված ալկոգելը բաժանվում է  տեղական ինքնակառավարման մարմիններին:

Ախտահանման աշխատանքները կատարվում են ամենայն պատասխանատվությամբ՝ փոխհամագործակցելով Ասկերանի շրջվարչակազմի, քաղաքապետարանի,  <<Խաչենշին>> ՓԲԸ-ի և շրջանի համայնքների հետ:

Շրջանային հակահամաճարակային բաժնի կողմից տրվում է մեթոդական օգնություն և տարվում են բացատրական աշխատանքներ, որպեսզի ախտահանիչ նյութերը ճիշտ ու նպատակային օգտագործվեն:

Ասկերանի «Խաչենշին» ՓԲԸ  աշխատակիցները բաժնի ախտահանողների հետ միասին ախտահանման աշխատանքներ են իրականացնում Ասկերան քաղաքի կենտրոնական պուրակում, խաղահրապարակներում: Պարբերաբար կատարվում են բազմաբնակարան շենքերի, հիմնարկ-ձեռնարկությունների ախտահանման աշխատանքներ:

Ապրիլի 14-ին ԱՀ Նախագահի ընտրություններին ընդառաջ շրջանի բոլոր 42 ընտրատեղամասում կատարվել են ախտահանման աշխատանքներ, որպեսզի ընտրություններն անցնեն անվտանգ և ընտրողներն իրենց ապահով զգան:

Իրադա Խաչատրյանը շեշտեց, որ պարբերաբար ախտահանման աշխատանքներ են կատարվում նաև շրջանի համայնքներում, սննդի օբյեկտներում և արտադրամասերում:

Ասկերանի շրջանային հակահամաճարակային բաժնի պետը մեկ անգամ ևս հորդորեց բնակիչներին պահպանել անձնական հիգիենայի կանոնները՝ առաջնորդվելով ԱՀ առողջապահության նախարարության հրահանգներով:

Կարինե ԲԱԽՇԻՅԱՆ