Ասկերանի շրջանում սանիտարա-համաճարակային հսկողությունը վերահսկվում է համաճարակաբանության և հիգիենայի Ասկերանի շրջանային բաժնի կողմից: Վերահսկողությունը կատարվում է պատշաճ մակարդակով և ամենայն պատասխանատվությամբ: Բաժինը տանում է աշխատանքներ սուր վարակիչ հիվանդությունների կանխարգելման համաճարակային իրավիճակի բարելավման համար: Վերջին ժամանակահատվածում Ասկերանի ՀՀ շրջանային բաժինն աշխատում է բազմապատկված պատասխանատվությամբ ՝ համաշխարհային խնդիր դարձած պանդեմիայի պատճառով:

Հակահամաճարակային բաժնի կողմից նոր տեսակի կորոնավիրուսի վարակի թափանցումը կանխարգելելու և շրջանում համաճարակային վիճակը կայուն պահպանելու

ուղղությամբ մեծ աշխատանքներ են տարվում: Բարեբախտաբար, շրջանում մինչ այսօր կորոնավիրուսի վարակի ոչ մի դեպք չի արձանագրվել:

Տեղեկանալու, թե ընդհանուր առմամբ  ինչպիսի իրավիճակ է տիրում շրջանում՝ որոշեցինք հանդիպել Ասկերանի շրջանային ՀՀ բաժնի պետ Իրադա Խաչատրյանի հետ:

-Տիկին Խաչատրյան, ինչպիսին է սանիտարահամաճարակային վիճակը շրջանում:

-2020 թվականի հունվարից առ այսօր  շրջանում  վարակիչ  հիվանդությունների իրավիճակը կայուն է: Գրանցվել է վարակիչ  հիվանդությունների 44 դեպք, որից` 7 ջրծաղկի, 7 քութեշի, 5 տրիխոֆիտիայի, 2 լեյշմանիոզի, 17 սուր աղիքային վարակ  չհաստատված  ծագման, 3 դիզենտերիայի, 3 գրիպ H1N1-ի  դեպքեր: Բոլոր  վարակիչ  հիվանդությունների  օջախներում  կատարվել են  ընթացիկ և եզրափակիչ  ախտահանման աշխատանքներ:

Պետք է նշեմ, որ Արցախի Հանրապետությունում 2011- 2020 թվականների   ընթացքում համաճարակային իրավիճակը ընդերային լեյշմանիոզ հիվանդության առումով լարվել է: Ընդերային լեյշմանիոզը տարափոխիկ հիվանդություն է, որի առանձնահատուկ փոխանցողները մլակներն են, իսկ հիվանդության աղբյուրը` թափառող շները, շնագայլերը, վայրի կրծողները: Ասկերանի շրջանում 2011-2020թթ. գրանցվել է ընդերային լեյշմանիոզի19 դեպք: Հիմք ընդունելով շրջանում գրանցված լեյշմանիոզ հիվանդության դեպքերը՝ ընդունվել է ծրագիր, որի նպատակն է կանխարգելել հիվանդության առաջացումը և տարածումը: Ըստ ընդունված ծրագրի՝շրջանի բոլոր համայնքներում կատարվում են սեզոնային դեռատիզացիոն և դեզինսեկցիոն աշխատանքներ: Այդ հարցում կարևոր է  գյուղական համայնքների, տարածքների սանիտարական պահպանման դրվածքը` կենցաղային աղբահանման  ժամանակին կազմակերպումը և տարածքների մաքրումը:

Շրջանում  համաճարակաբանական   իրավիճակը   կատաղության  հիվանդությունների հետ կապված ևս մնում է կայուն: 2020 թվականին  գրանցվել է կենդանիների կողմից տուժածների 27 դեպք: Հիվանդության  կանխարգելման  նպատակով բոլոր հաշվառված անձիք ստացել են փայտացման և հակակատաղության դեմ պատվաստումներ, նրանք գտնվում են վերահսկողության տակ:

-Ինչպես է իրականացվում իմունականխարգելումը:

-ԱՀ-ում իմունականխարգելումն իրականացվում է 2011-2015 թթ. Իմունականխարգելման պետական ծրագրի շրջանակում` 11 վարակիչ հիվանդությունների դեմ, պատվաստումների պետական օրացույցի համաձայն: Զանգվածային պատվաստումների շնորհիվ հանրապետությունում, ինչպես նաև մեր շրջանում համաճարակային իրավիճակը կայունացված է :

Պատվաստանյութերը մենք ստանում ենք Հայաստանի Հանրապետությունից, դրանք բոլորը համապատասխանում են որակի սահմանված չափանիշներին, և ունենք պատշաճ պայմաններ պատվաստանյութերը տեղափոխելու և պահպանելու համար:

45 օրը մեկ (8  շրջագայությամբ)  բոլոր համայնքներում կատարում ենք  0-18 տարեկան երեխաների և բնակչության   26, 36, 46, 56  տարիքային  խմբերի պատվաստումները: Շրջանում իրականացնում ենք  նաև  նախազորակոչի պատվաստումները:

Պատվաստանյութերի տեղափոխումն իրականացվում է սառնարան  պայուսակներով` խստիվ պահպանելով սառցային շղթան:

-Ինչպիսի՞ հետազոտություններ են կատարվում բաժնի կողմից:

-Շրջանի ՀՀ բաժինն ունի լաբորատոր ծառայություն, որն իրականացնում   է անհրաժեշտ ծավալի մանրէաբանական, սանիտարաքիմիական, մակաբուծաբանական հետազոտություններ: 2020 թվականին կատարվել  է մանրէաբանական 1169, մակաբուծաբանական` 535 հետազոտություն, որից 21-ը դրական  արդյունքներով էին: Կատարվել է նաև ջրի        սանիտարաքիմիական և մանրէաբանական 130 հետազոտություն: Ջրի բարելավման  գործում  կարևոր են այն  աշխատանքները, որոնք  իրականացվում են համայնքների ղեկավարների և Ասկերանի <<Խաչենշին>>  ՓԲԸ-ի  կողմից: Ամառային  սեզոնին սուր աղիքային վարակների կանխարգելման նպատակով կարևոր են  ջրավազանների մաքրման և ախտահանման աշխատանքները, որոնք, պետք է փաստեմ, Ասկերանի <<Խաչենշին>> ՓԲԸ կողմից իրականացվում են պարբերաբար:

Բաժնի կողմից տարվում են բացատրական աշխատանքներ բնակչության շրջանում՝ նրանց ուշադրությունը սևեռելով աղբը և կեղտաջրերը համապատասխան տեղեր թափելու վրա, իսկ ամառային օրերին ավելի է խստացվում մեր կողմից իրականացվող վերահսկողությունը շրջանի սանիտարական կանոնների պահպանման ուղղությամբ:

Շեշտեմ, որ բաժինը սերտ համագործակցում է Ասկերանի <<Խաչենշին>> ՓԲԸ, շրջանի բոլոր համայնքների ղեկավարների և շրջանում գործող հիմնարկ-ձեռնարկությունների հետ:

- Տիկին Խաչատրյան, այսօր լարված և դժվարին ժամանակաշրջան ենք ապրում, նոր կորոնավիրուսը, ասես, փոխել է մարդկանց բնականոն կյանքի հունը…

- Իհարկե, բնական է, որ բնակչության մեջ նկատվում է որոշակի խուճապ, առանձնապես այն երևում է մեծահասակների և քրոնիկ հիվանդների մոտ, որոնք դասվում են խոցելի խմբերին: Միաժամանակ, պետք է նկատենք և ողջունենք, որ բնակչությունը կարողանում է պահպանել անձնական հիգիենայի կանոնները և առաջնորդվել ԱՀ առողջապահության նախարարության հրահանգներով:

Անհերքելի է, որ բացատրական աշխատանքները ևս տալիս են դրական արդյունքներ, մարդիկ գիտակցում, հասկանում են այդ հիվանդության ողջ լրջությունը, հետևում են մյուս պետությունների իրադարձություններին և անում են ամեն ինչ, որպեսզի խուսափեն վարակի ներթափանցումից:

Ասեմ, որ շրջանում ստեղծվել է կորոնավիրուսի տարածումը կանխարգելող աշխատանքները համակարգող շրջանային հանձնաժողով, որը ղեկավարում է Ասկերանի շրջվարչակազմի ղեկավարի տեղակալ Արթուր Հարությունյանը: Բոլոր տեսակի կանխարգելիչ միջոցառումները կատարում ենք համագործակցելով, և փաստեմ, որ շրջանում այդ աշխատանքները պատշաճ մակարդակի վրա են:

Հատուկ ուշադրության կենտրոնում են գտնվում  գործող բոլոր հիմնարկ - ձեռնարկությունները, խանութները և սննդի օբյեկտները: Ուժեղացվել է հսկողությունը սանիտարահիգիենիկ ռեժիմի և ախտահանման լրացուցիչ միջոցառումների իրագործման նկատմամբ: Սննդի բոլոր օբյեկտները ապահովված են ախտահանիչ նյութերով, աշխատակիցները կրում են անհատական օգտագործման դիմակներ և ձեռնոցներ՝ պահպանելով հիգիենայի բոլոր կանոնները: Ասկերանի <<Խաչենիշին>> ՓԲԸ-ի աշխատակիցները բաժնի ախտահանողների հետ միասին ախտահանման աշխատանքներ են իրականացնում Ասկերան քաղաքի կենտրոնական պուրակում և բոլոր խաղահրապարակներում: Պարբերաբար կատարվում են բազմաբնակարան շենքերի շքամուտքերի, հասարակական տրանսպորտային միջոցների, հիմնարկ-ձեռնարկությունների շենքերի ախտահանման ամենօրյա աշխատանքներ:

Կորոնավիրուսի տարածումը կանխարգելող աշխատանքներն ավելի արդյունավետ իրականացնելու համար բաժինը համագործակցում է Ասկերանի շրջվարչակազմի, ոստիկանության Ասկերանի շրջբաժնի, Ասկերանի շրջանի ԱԻՊԾ բաժնի, Ասկերանի ՇԲՄ-ի, Ասկերանի <<Խաչենշին>> ՓԲԸ-ի և համայնքների ղեկավարների հետ:

Կցանկանայի շրջանի բնակչությանը հորդորել խուճապի չմատնվել, սակայն պահպանել ողջամտություն, լինել աչալուրջ և պահպանել անձնական հիգիենայի բոլոր կանոնները:

Եկեք, գնահատենք մարդու համար ամենակարևորը՝ առողջությունը և աշխատենք առողջ լինել:

Դե ինչ, կարծում եմ՝ մեզանից յուրաքանչյուրը կհամակվի իր շրջապատի սանիտարական մաքրությունը պահպանելու ավելի մեծ ցանկությամբ և այս բարդ ժամանակահատվածում կլինենք զգոն, կարգապահ, որպեսզի կարողանանք համատեղ ուժերով հաղթահարել հանկարածակի բռնկված համավարակը:

Կարինե ԲԱԽՇԻՅԱՆ