Արդեն երրորդ ամիսն է, ինչ աշխատում ենք համավարակի թելադրած արտակարգ իրավիճակի պայմաններով։ Բազմաթիվ միջոցառումներ շրջանում չեղարկվել են, որոշ դեպքերում ընտրվել են այլընտրանքային տարբերակներ։

2020 թվականի տարեսկիզբը բազմաբովանդակ միջոցառումներով էր մեկնարկել Ասկերանի շրջվարչակազմի աշխատակազմի մշակույթի բաժինը, ինչը խոստումնալից շարունակություն էր ենթադրում։ Սակայն COVID-2019-ն իր ուղղումներն է մտցրել յուրաքանչյուր բնագավառում և աշխատաոճում։ Թե ինչպես են

աշխատում արտակարգ իրավիճակի պայմաններում և ինչպիսի միջոցառումներ է կազմակերպել և անցկացրել շրջանում մշակույթի բաժինը մինչ համավարակ՝ իմացանք բաժնի վարիչ Ռուզաննա Մկրտչյանից։

-Տիկին Մկրտչյան, նախ խոսնեք 2019 թվականի շրջանի մշակութային կյանքի մասին։

-Մշակույթի և երիտասարդության հարցերի բաժինը բազմաբնույթ միջոցառումների և համերգների կազմակերպմամբ իրականացնում է շրջանի բնակչության մշակութային սպասարկումը, ինչպես նաև կանոնակարգում երիտասարդության հետ տարվող աշխատանքները: Մշակույթի ոլորտը ներառում է 36 համայնքային ենթակայության մշակույթի տներ, ՙԱսկերանի մշակույթի և երիտասարդության կենտրոն՚, ՙԱսկերանի արվեստի դպրոց՚, ՙԱսկերանի Գ.Գաբրիելյանի անվան կենտրոնական գրադարան՚ և ՙԱստղաշենի արվեստի դպրոց՚ ՊՈԱ կազմակերպությունները:

2019թ. կազմակերպվել են բազմաբովանդակ միջոցառումներ: Ոլորտը ներառող մշակութային հիմնարկների հետ կարողացել ենք պատվով իրականացնել բոլոր ծրագրերը, ինչպես նաև նախարարության և շրջվարչակազմի կողմից տրված հանձնարարականները, շրջայցեր ենք կատարել գյուղական մի շարք համայնքներ, ուսումնասիրել արվեստի դպրոցների մասնաճյուղ խմբերի և մշակույթի օջախների աշխատանքային գործունեությունը, օժանդակել և աջակցել համայնքներում կազմակերպվող մշակութային և երիտասարդական միջոցառումներին:

Տարվա ընթացքում շրջանում կազմակերպվել են ազգային-եկեղեցական, հիշարժան և տոն օրերին նվիրված մի շարք միջոցառումներ: Երիտասարդության շրջանում նույնպես իրականացրել ենք տարբեր բնույթի մի շարք ծրագրեր՝ կազմակերպել ենք շրջանի երիտասարդության հանդիպումը շրջվարչակազմի ղեկավարի հետ, որտեղ քննարկվել են երիտասարդությանը հուզող հարցերն ու խնդիրները: ՙԱռողջ ապրելակերպ՚, քայլարշավներ, ինտելեկտուալ խաղ-մրցույթներ, ուխտագնացություններ, էքսկուրսիաներ դեպի Արցախի պատմական տեսարժան վայրեր:

Կա սերտ համագործակցություն պաշտպանության բանակի զորամասերի հետ: ՙԲերդ՚ համույթը բազմիցս համերգային ծրագրերով հանդես է եկել շրջանի տարբեր զորամասերում: Այդ համերգները դարձել են ավանդական, միշտ լինում ենք մեր զինվորի կողքին, ոգևորում և քաջալերում նրանց: Մեր զինվորներին մասնակից ենք դարձնում նաև շրջկենտրոնում կազմակերպվող բոլոր միջոցառումներին:

Մասնակցել ենք նաև հանրապետությունում կազմակերպված մի շարք միջոցառումների՝ ՙԶվարթնոց՚ հայ-երգի մրցույթ-փառատոնին, ՙՀայոց Այբուբենի Սահմանը՚ հայապահպանական ծրագրին, ՙԱրցախյան գորգարվեստ՚ մրցույթին, ՙՀերոսների հետքերով՚ հայրենասիրական դաս-արշավին, ՙՀետհաշվարկ՚ ինտելեկտուալ հեռուստախաղ-մրցույթին, ՙԸնտանեկան ճամբար՚, ՙԱրցախի երիտֆորում՚ ամենամյա ծրագրերին և ՙՎերածնունդ՚ միջազգային 11-րդ մրցույթ-փառատոնին, որտեղ Ասկերանի արվեստի դպրոցի պարարվեստի և նկարչության բաժնի սաներն արժանացել են 2-րդ և 3-րդ կարգի դիպլոմների:

Ակտիվ մասնակցություն ենք ունեցել ամռանն Արցախում կազմակերպված ՙԿոնԻՖԱ Եվրո-2019՚ և ՙՀամահայկական 7-րդ խաղեր՚ միջոցառումներին, որոնք աննախադեպ էին հանրապետության, ինչպես նաև շրջանի մարզական կյանքի և զբոսաշրջության զարգացման համար:

Շրջվարչակազմի ղեկավար Հակոբ Ղահրամանյանի միջնորդությամբ մշակույթի ոլորտում իրականացվել են մի շարք բարեգործական ծրագրեր։ ՙԱպագա սերունդների հիմնադրամ՚-ի հիմնադիր Գրիգորի Արկադիի Գաբրիելյանցն Ասկերանի Գ. Գաբրիելյանի անվան կենտրոնական գրադարանին է նվիրել գրադարակներ, գրքեր, ինչպես նաև ժամանակակից տեխնիկական սարքավորում՝ նոութբուք, իսկ ՙԱրարիչ՚ բարեգործական հիմնադրամն Ասկերանի արվեստի դպրոցի պարախմբի սաներին՝ ազգային հագուստ:

-Փաստորեն, մեր ամենօրյա աշխատանքային օրակարգը նոր կորոնովիրուսի հետևանքով կաթվածահար է եղել, ինչպիսի՞ պայմաններում են աշխատում այժմ մշակույթի բաժինը և նրա ստորաբաժանումները։

-Կորոնավիրուսի հետևանքով աշխարհում առաջացած ճգնաժամային աննախադեպ իրավիճակը հանրապետությունում հանգեցրել է տնտեսական ակտիվության կտրուկ նվազմանը։ Նյդ ամենը, բնականաբար, իր բացասական ազդեցությունն  է թողել նաև մշակութային կյանքի ակտիվության վրա: Ստեղծված իրավիճակում քայլեր ենք ձեռնարկում հնարավորինս մշակութային կյանքն աշխուժացնելու ուղղությամբ:

Այդ նպատակով բաժինը առցանց ձեռքի աշխատանքների մրցույթ է հայտարարել՝ նվիրված երեխաների պաշտպանության միջազգային օրվան, որտեղ մրցույթի հաղթող մասնակիցները կպարգևատրվեն նվերներով և պատվոգրերով:

Ինչ վերաբերում է մշակույթի ոլորտի ստորաբաժանումներին, ապա կարող եմ ասել, որ պահպանում են Արցախում հայտարարված արտակարգ իրավիճակից բխող բոլոր կանոնները:

-Ինչպիսի՞ն էին պլանները ընթացիկ տարվա համար՝ մինչ COVID-2019-ը և առաջիկայում ինչպիսի՞ պլաններ կան։

-Ասկերանի շրջվարչակազմի մշակույթի և երիտասարդության հարցերի բաժինը 2020թ. կազմակերպել է մի շարք միջոցառումներ՝ Սուրբ Սարգիս զորավարի տոն, Տեառնընդառաջ ազգային եկեղեցական տոն, Ասկերանի վերածննդի օր, Գրքի նվիրատվության օր, Կանանց միամսյակին նվիրված միջոցառումներ:

Համաճարակի հետ կապված մարտի 14-ից չեղարկվել է ՝ Թատրոնի միջազգային օրվան, ՙՍուրբ Զատիկ՚ ազգային - եկեղեցական տոնին, Մեծ եղեռնին, Պարի միջազգային օրվան, Հաղթանակի, ԱՀ պաշտպանության բանակի կազմավորման և Շուշիի ազատագրման օրվան նվիրված միջոցառումների կազմակերպումը:

Տարվա կտրվածքով նախատեսված են ազգային-եկեղեցական, հիշարժան և տոն օրերին նվիրված մի շարք միջոցառումներ, ինտելեկտուալ խաղեր, քայլարշավներ, հոգևոր անվտանգություն թեմայով հանդիպումներ երիտասարդների հետ, կլոր սեղաններ,  շաբաթօրյակներ, ուխտագնացություններ և առողջ ապրելակերպ ծրագրի շրջանակներում՝ հակածխախոտային ֆլեշմոբ, թատերական էտյուդների բեմադրություն, երաժշտական ֆլեշմոբ, առողջ սնունդ ֆլեշմոբ, վազքի մրցույթ, հեծանվավազք, առողջ ապրելակերպ թեմայով դասախոսություններ և միջոցառումներ զինվորների համար։

Դեռ որոշակի անորոշություն կա ճգնաժամի հաղթահարման ժամանակի առումով։ Այդ իսկ պատճառով աշխատանքներ ենք տանում բազմաթիվ ծրագրեր առցանց տիրույթ տեղափոխելու ուղղությամբ:

Այսօր հասարակության առողջության հարցն առաջնային է, ուստի հաջողություն և առողջություն եմ մաղթում բոլորին, թող որ այս ճգնաժամը շուտ հաղթահարվի և նորից սկսենք ապրել ակտիվ մշակութային կյանքով:

-Շնորհակալություն։ Շարունակենք ինտեգրված և հավատարիմ մնալ համավարակի թելադրած պայմաններին։ Հուսանք, առաջիկայում ամեն ինչ իր բնականոն հունի մեջ կընկնի և կսկսենք աշխատել նորմալ ռեժիմով՝ հագեցած մշակութային կյանքով։

-Շնորհակալություն. Հաջողություն և առողջություն բոլորիս։

Հարցազրույցը՝ Անահիտ ՊԵՏՐՈՍՅԱՆԻ