Նոր կորոնովիրուսային վարակի (COVID-19) տարածման կանխարգելման նպատակով Արցախի Հանրապետության առողջապահության նախարարության կողմից շարունակվում են հակահամաճարակաբանական միջոցառումները:

Ինչպես մեզ տեղեկացրեց Ասկերանի շրջանային հակահամաճարակային բաժնի պետ Իրադա Խաչատրյանը, շրջանում համաճարաբանական իրավիճակը շարունակվում է գտնվել բաժնի վերահսկողության տակ:

Ախտահանման աշխատանքները կատարվում են ամենայն պատասխանատվությամբ, բնակչության հետ տարվում են համապատասխան բացատրական աշխատանքներ, տրվում է մեթոդական օգնություն:

Բաժինը համագործակցում է Ասկերանի քաղաքապետարանի, Ասկերանի <<Խաչենշին>> ՓԲԸ-ի, ԱՀ ԱԻՊԾ Ասկերանի շրջանային բաժնի հետ:    Պայմանավորվածության համաձայն, օրերս հիմնարկ-ձեռնարկությունների շրջակայքում, քաղաքային մանկական խաղահրապարակներում ԱՀ ԱԻՊԾ Ասկերանի շրջանային բաժնի կողմից իրականացվեցին ախտահանման աշխատանքներ, ինչը, Իրադա Խաչատրյանի հավաստմամբ, ավելի մեծ արդյունավետություն ունի և այդ միջոցառումները շարունակական բնույթ են կրելու:

ՀՀ բաժնի պետը տեղեկացրեց, որ Ասկերանի շրջանային բաժնի մասնագետներն ախտահանման աշխատանքներ են կատարել հանրապետության այլ շրջաններում հաստատված օջախներում, կոնտակտավորների բնակարաններում և մեկուսարան հանդիսացող վայրերում: Նա գոհունակությամբ խոսելով բաժնի աշխատողների մասին՝ շեշտեց, որ բաժինն ունի պատրաստակամ և գիտակ թիմ, որը պատրաստ է նույն պատասխանատվությամբ իրականացնել իրեն վերապահված բոլոր աշխատանքները:

Շրջանային հակահամաճարակային բաժնի պետը նշեց նաև, որ այժմ կորոնավիրուսի հայտնաբերման և կանխարգելման աշխատանքներ են իրականացվում Ասկերանի շրջանում: Շրջանի համայնքներից մեկում մեկուսարան հանդիսացող կացարանում կան մեկուսացված քաղաքացիներ, որոնց վերահսկողությունը նույնպես իրականացվում է բաժնի կողմից: Իրադա Խաչատրյանն ավելացրեց,  որ վարակակիրներն Ասկերանի շրջանից չեն:

Նա  մեկ անգամ ևս հորդորեց բնակիչներին պահպանել անձնական հիգիենայի կանոնները, լինել կարգապահ, ողջամիտ:

-Առաջնորդվելով առողջապահության նախարարության հրահանգներով,  հարգելով մեկս մյուսին և բարձր գնահատելով մարդու համար ամենակարևորը՝ առողջությունը,  կկարողանանք խուսափել վարակի լայն տարածումից: Կարծում եմ՝ գիտակից ժողովուրդ ենք և այս համավարակին կկարողանանք հաղթել,-շեշտեց ՀՀ բաժնի պետը:

 Կարինե ԲԱԽՇԻՅԱՆ