Հուլիսի 13-ին Ասկերանի զինկոմիսարիատի բակը մարդաշատ էր: Մեկնարկում էր ամառային առաջին զորակոչը, շրջանի 18 պատանիներ պատրաստվում էին համալրելու Արցախի հզոր և ամուր բանակի շարքերը: Բանակ, որը մեր տղաներին կդարձնի առնական և կամային, ինքնավստահ և ուժեղ: Նրանք դառնալով այդ փառավոր բանակի մի մասնիկը՝ Հայրենիքի համար ծառայության տարեգրության մեջ մի նոր էջ կբացեն և, համոզված ենք, ոչնչով չեն զիջի իրենց պապերին, հայրերին ու եղբայրներին:

Ասկերանի տարածքային զինկոմիսար Արծվիկ Գաբրիելյանն իր սրտի խոսքն ասելով նորակոչիկներին՝ շեշտեց.

- Այսօր դուք համալրելու եք մեր պանծալի բանակի շարքերը և հպարտությամբ ու մեծ պատասխանատվությամբ պետք է կրեք զինվորական համազգեստն ու զինվորի կոչումը:

Պատգամում եմ ձեզ լինել մշտարթուն, կարգապահ, ընկերասեր և երբեք չմոռանաք, որ մեր դարավոր թշնամին շարունակում է նյութել իր դավերը:

Համոզված եմ՝ ձեր ուժեղ կամքով և հայավայել ծառայությամբ ու քաջությամբ անսասան կպահեք այս հաղթական հողը, որը մեր հերոսների արյամբ է ներծծված:

Թող այս երկու տարիները ձեզ համար լինեն նորովի կայացման և ինքնահաստատման տարիներ՝ լեցուն հայրենասիրության բազում դասերով:

Թող ձեր ծառայությունը խաղաղ  և անփորձանք լինի, թող ձեր բազկի ուժից միշտ դողա թշնամու սիրտը:

Նորակոչիկների հարազատները հուզված էին, սակայն այդ հուզմունքին միախառնված էին նաև հպարտության զգացմունքները…

Համոզված ենք՝ երկու տարի հետո մենք գրկաբաց կդիմավորենք յուրաքանչյուրիդ և երախտապարտ կլինենք ձեր անբասիր ծառայության և մեր խաղաղությունն ապահովելու համար:

Թող ձեր ծառայությունն անփորձանք լինի, մենք սպասում ենք ձեզ…

Փառք ու պատիվ մեր բոլոր զինվորներին ու հրամանատարներին՝ ովքեր ուս ուսի տված պաշտպանում են հայրենի սահմանները:

ՀԳ

Նշենք, որ Ասկերանի շրջանային համաճարակաբանության և հիգիենայի  բաժնի կողմից նախօրոք զորակոչիկներից վերցվել են փորձանմուշներ՝ թեստավորման նպատակով /Covid-19/ ՊՇՌ հետազոտության համար:

Կարինե ԲԱԽՇԻՅԱՆ