Ասկերանի  Էդմոն Բարսեղյանի  անվան  միջնակարգ   դպրոցի  համար  օրացույցի  յուրաքանչյուր  օր  հագեցած  է, արտասովոր, տպավորիչ  ու  անմոռանալի,  լինի դա  երախտիքի, մեծարման, հարգանքի  տուրքի  մատուցման, ազգային  ավանդույթերի  պահպանման, ՙԱյբուբենի՚  կամ ՙՎերջին  զանգի՚  տոն:

Այսօրվա առիթը  ևս  հիշարժան է…

Օգոստոսի  19-ին լրանում  է  իր  մասնագիտությանը  նվիրված  մանկավարժի  ու  դպրոցի հոգսերով մտահոգ  տնօրենի՝  Մարելլա  Վազգենի  Ավանեսյանի  ծննդյան 60-ամյակը:

Դպրոցի  գործի  նվիրյալներից է, այսօրն ու  ապագան  շաղկապող,  մեծ  կոլեկտիվի  արհեստավարժ  ղեկավարն  ու  ապագայի  հանդեպ  հավատով  լցված  և  մաքառման  պատրաստ  աշակերտական կոլեկտիվի  առաջնորդը:

Մարելլա Ավանեսյանը  ծնվել է  1960թ.՝ արդար,  աշխատավոր

և  բազմազավակ  ընտանիքում:  Սովորել  է  Ստեփանակերտի  Եղիշե  Չարենցի  անվան  թիվ 7  դպրոցում: Աշակերտելով   սիրելի  ուսուցչուհի  Գրետա Հայրապետյանին՝ արդեն  դպրոցական տարիներին  հաստատ  գիտեր, որ  պիտի դառնա  քիմիայի ուսուցչուհի  և  առաջնորդվի  Մենդելեևի  խոսքերով՝  այն դարձնելով  կյանքի  կարգախոս. ՙՈւսուցչի ամբողջ հպարտությունն  աշակերտների  մեջ  է՚:

Ավարտել է  Ստեփանակերտի մանկավարժական  ինստիտուտի ՙՔիմիա-կենսաբանություն՚ բաժինը: Աշխատանքային գործունեությունն սկսել է Ասկերանի  գրադարանային ցանցի կենտրոնական  բաժանմունքից: Հետագա  տարիներին աշխատել է Ասկերանի մանկապարտեզում՝ որպես դաստիարակ:

Առանձին հուզմունքով ու սրտի թրթիռով հիշում է 1987-88 ուստարին, երբ աշխատանքի անցավ դպրոցում, որտեղ առայսօր անցնում են նրա կյանքի լավագույն և իմաստալից  տարիները:

Ուսումը, հարգանքն ու կարգապահությունն այն էական դրույթներն  են, որ  արժևորում է խստապահանջ  մանկավարժը, ով միշտ պատասխանատու է իր  կատարած աշխատանքի որակի և արդյունքի համար:

Իր արդյունավետ, արգասաբեր աշխատանքով նպաստել է սովորողների մեջ  դրական, որակյալ արժեհամակարգի ձևավորմանն ու զարգացմանը:

Անաչառ ու անկողմնակալ է գնահատման մեջ, երբեք իրարից չի անջատում կրթելն ու դաստիարակելը: Իր մասնագիտությամբ և փորձով կարողանում է  խանդավառել սաներին, թևավորում և հասցնում է բարձունքների:

Ընկեր Ավանեսյանի տված գիտելիքներն աշակերտի համար դառնում են  անկողոպտելի գանձեր:

Բազմիցս արժանացել է պատվոգրերի,գնահատանքի, բայց  միշտ  նշում է, որ ամենամեծ պարգևն իր աշակերտների անթաքույց սերն ու  հարգանքն է, շնորհավորական խոսքերն ու հեռու-մոտիկ հեռախոսազանգերը:

Չմոռանանք նշել, որ Մարելլա Ավանեսյանը հոգատար մայր է ու  կին, սիրառատ  տատիկ:

Ծննդյան օրվա բերկրանքը կիսում է սիրելի  թոռնիկ Հայկի հետ, ով էլ իր ծննդյան օրը նշում է այսօր՝ գունեղ ու իմաստալից դառձնելով տատիկի 60-ամյակը:

Տարիները Մարելլա Ավանեսյանին բերել են նաև հարգանք ու ճանաչում՝ հասցնելով նրան  ուսուցչուհուց  կազմակերպչի, հետո  ուսմասվարի և արդեն 7 տարի է բազմաթիվ հաջողություններ ու ձեռքբերումներ ունեցող դպրոցի տնօրենի:

Ընթացիկ աշխատանքային տարիներին միշտ եղել է խստապահանջ, բայց  և  հոգատար, ինչպես  ուսուցչական և աշակերտական կոլեկտիվների հանդեպ, այնպես էլ  դպրոցական գույքի, շենքի խնամքի պահպանման  հարցերով մտահոգ:

Եվ նախքան օրացույցի հերթական թերթիկը շրջելն ի սրտե շնորհավորում ենք հարգելի տնօրենին վաթսունամյա հոբելյանի առիթով, մաղթում՝ ամենալավն ու  բարին, առողջություն և անսպառ եռանդ, նորանոր հաջողություններ, ձեռքբերումներ: Մենք գնահատում ենք Ձեր համբերատար ու սրտացավ վերաբերմունքը, Ձեր հոգատարությունն ու ջերմությունը, որ տարիներ  շարունակ  տվել եք Ձեր սաներին ու շրջապատին:

Ասկերանի  Էդմոն Բարսեղյանի  անվան

միջնակարգ  դպրոցի  ուսուցչական  կոլեկտիվ