Օգոստոսի 24-ին Ասկերանի շրջվարչակազմի նիստերի դահլիճում կայացավ խորհրդակցություն՝ համայնքների ղեկավարների մասնակցությամբ, որը վարում էր շրջվարչակազմի ղեկավար Աշոտ Դադայանը: Ներկա էին նաև շրջվարչակազմի ղեկավարի տեղակալները, բաժինների վարիչներ և ներկայացուցիչներ:

Խորհրդակցությունը ճանաչողական բնույթ էր կրում, ինչպես նաև իր մեջ ներառում էր բազմաբնույթ հարցեր:

Շրջվարչակազմի ղեկավարը ողջունելով ներկաներին՝ նշեց, որ հանդիպումը, իհարկե, ուշացել է, սակայն այն

ունեցել է իր պատճառները:

-Ուրախ եմ, որ պետք է միասին աշխատենք և կարծում եմ՝ մեր գործելաոճով հաջողություններ կարձանագրենք և կկարողանանք օրինակ ծառայել նաև մյուս շրջաններին:

Այսօր մեր առջև ծառացած են հրատապ խնդիրներ և հարցեր, որոնք միայն  բոլորիս համագործակցված աշխատանքի արդյունքում կլուծվեն:

Առանձնապես ցանկանում եմ կանգ առնել շրջանում իրականացվող շինանյութերի տրմադրման վրա: Եղել ենք որոշ համայնքներում, բնակիչների կողմից կան բողոքներ: Չանդրադառնալով անցյալին՝ շեշտեմ, որ այսուհետ այդ գործընթացն իրականացվելու է հստակ ձևաչափով, առանց խտրականության և միայն անաչառ ու թափանցիկ սկզբունքով: Պետությունը շինանյութ է տրամադրում և այն պետք է հասնի իր ճիշտ հասցեատիրոջը: Շուտով եղանակներն անբերանպաստ կդառնան շինարարություն և, հատկապես, տանիք փոխելու համար: Կարծում եմ՝ գործընթացը պետք է ավելի արագացնել և այն սկսել վերին ենթաշրջանից: Ասեմ, որ լինելու եմ հետևողական, անձամբ այցելելու եմ համայնքներ:

Անշուշտ, համայնքի ղեկավարից լավ ոչ ոք քաջատեղյակ չէ իր համայնքի բնակիչների կարգավիճակին, սոցիալ-տնտեսական պայմաններին: Բոլորիդ հորդորում եմ շինանյութերի տրամադրմանը մոտենալ օբյեկտիվ, ազնվորեն և անել այնպես, որ օգնությունը հասնի միայն կարիքավորին:

Դուք ժողովրդի վստահությունն ստացած մարդիկ եք և պարտավոր եք արդարացնել նրանց հույսերը: Ուրախ կլինեմ, որ պատվով դուրս գանք մեր առջև ծառացած այս խնդրից և հավաստիացնում եմ՝ շինանյութերի տրամադրման շրջանային հանձնաժողովը լինելու է արդարացի:

Շրջվարչակազմի ղեկավարն անդրադարձավ նաև համայնքներում տիրազուրկ տների գույքագրման կարևորությանը, վերին ենթաշրջանում կաթի ընդունման կետի և աղբավայրի համար տեղանքի ընտրությանը՝ դրանք համարելով հրատապ հարցեր:

Ջրաղացների համայնքի ղեկավար Արսեն Հայրապետովը ողջունելով նման հանդիպումը՝ նշեց, որ, իրոք, համայնքներում շատ անելիքներ կան: <<Իհարկե, բողոքողներ և դժգոհողներ միշտ կլինեն, սակայն դրանք հիմնականում այն մարդիկ են, ովքեր միշտ խուսափում են հարկերի վճարումներից և գյուղում իրականացվող հասարակական աշխատանքներին մասնակցելուց: Նրանց գործն անընդհատ բողոքելն է: Միաժամանակ, համայնքում կա պատասխանատու, նվիրված բնակիչների մի խումբ, ով պատրաստակամ է գյուղի զարգացման համար անել հնարավորը: Որպես համայնքի ղեկավար իմ լուման եմ ներդնելու համայնքի զարգացման համար, իսկ շինանյութերի տրամադրմանը կմոտենանք առավելագույն պատասխանատվությամբ>>,-ասաց Ա.Հայրապետովը:

Ապա շրջվարչակազմի աշխատակազմի ՔՃՎ բաժնի գլխավոր մասնագետ Արմեն Սարգսյանը տեղեկություններ հաղորդեց 2020 թվականի փետրվարից շրջանի համայնքների ներհամայնքային ճանապարհների նախատեսվող սալապատման և իրականացվող աշխատանքների մասին: Ներհամայնքային ճանապարհների սալապատման համար հայտ է ներկայացրել 22 համայնք, երկուսում ավարտվել են, իսկ քսանում ընթացքի մեջ են աշխատանքները։ Եվս երեք համայնք  ցանկություն է հայտնել ընդգրկվելու այդ ծրագրում:

Շրջվարչակազմի աշխատակազմի գյուղբաժնի վարիչ Արվիդ Ղուլյանն իր ելույթում անդրադարձավ գարնանացան սերմերի պահանջարկի հայտերին, 2020 թվականին բնական աղետներից տուժած հողատարածքների ակտավորմանն՝ ըստ մշակաբույսերի և հողօգտագործման ձևի, 2021 թվականի բերքի տակ աշնանացանի նախապատրաստմանը:

Համայնքների ղեկավարների հուզող հարցերին, որոնք կապված էին հարկերի հավաքագրման, տիրազուրկ տների, շինանյութերի տրամադրման, ներհամայնքային ճանապարհների սալապատման և գյուղատնտեսական աշխատանքների հետ, սպառիչ պատասխաններ տվեցին շրջվարչակազմի ղեկավար Աշոտ Դադայանը, <<Ասկերանի Խաչենշին>> ՓԲԸ տնօրեն Արմեն Բախշիյանը, շրջվարչակազմի աշխատակազմի գյուղբաժնի վարիչ Արվիդ Ղուլյանը:

Կարինե ԲԱԽՇԻՅԱՆ