Սեպտեմբերի 4-ին Ասկերանի շրջվարչակազմի ղեկավար Աշոտ Դադայանի գլխավորությամբ շրջվարչակազմի նիստերի դահլիճում կազմակերպվեց խորհրդակցություն, որին ներկա էին ԱՀ գյուղատնտեսության փոխնախարար Վիլեն Ավետիսյանը, անասնաբուծության և անասնաբուժության վարչության պետ Նորայր Մուսայելյանը, ջրային համակարգերի պահպանության և օգտագործման պետական վարչության պետ

Արմեն Ներսիսյանը, շրջվարչակազմի ղեկավարի տեղակալ Արմեն Ղազարյանը:

Մասնակցում էին շրջանի համայնքների ղեկավարները, շրջվարչակազմի աշխատակազմի գյուղբաժնի մասնագետները, շրջանի գյուղատնտես-մասնագետները:Խորհրդակցության նպատակը գյուղատնտեսության ոլորտում պետական աջակցության նոր ծրագրի նախագծերի ներկայացումն էր:

Վիլեն Ավետիսյանը ողջունելով ներկաներին և շնորհակալություն հայտնելով համագործակցության համար՝ շեշտեց, որ այսօրվա հանդիպման նպատակն է՝ ավելի մանրամասն ներկայացնել գյուղնախարարության մասնագետների կողմից մշակված նոր կարգերը և գործող կարգերում իրականացված փոփոխությունները: Աջակցության ծրագրերը բաղկացած են երեք մասերից՝ բուսաբուծություն, անասնաբուծություն և ոռոգման համակարգեր:

Նա մանրամասն տեղեկություններ հաղորդեց բուսաբուծության զարգացման և բույսերի պաշտպանության ծրագրերի մասին՝  կանգ առնելով աշնանացան մշակաբույսերի սերմերի ներկրման, սուբսիդավորման ծրագրի վրա:

ԱՀ գյուղատնտեսության փոխնախարարը բացատրեց հողօգտագործողների փաստաթղթերի հավաքագրման ընթացակարգը:

Նա տեղեկացրեց նաև, որ այսուհետ Արցախի հողօգտագործողները հնարավորություն են ստանալու սեփականաշնորհված և վարձակալության իրավունքով օգտագործվող հողը և համայնքներում արտադրական նշանակության բոլոր տեսակի օբյեկտները գրավադրելու և ձեռք բերելու անտոկոս վարկ՝ գյուղատնտեսության մեջ ներդնելու նպատակով:

Նորայր Մուսայելյանը  խոսեց անասնաբուծության ու անասնապահության զարգացման ծրագրերի մասին: Նա մանրամասն ներկայացրեց անասունների ներկրման, անասնապահության զարգացման խթանման, անասնաբուծական մթերքների և սննդամթերքի վերամշակման արտադրամասերի, սպանդանոցների ու անասնաշենքերի կառուցման ու վերանորոգման պայմանները:

Ջրային համակարգերի պահպանության և օգտագործման պետական վարչության պետ Արմեն Ներսիսյանը անդրադարձավ ոռոգման բնագավառի բարելավմանն ուղղված ծրագրերին: Նա շեշտեց, որ այդ ծրագրերի նպատակն է պետական աջակցության միջոցով ավելացնել ոռոգման ժամանակակից համակարգերով ու մեխանիկական եղանակով ջրարբիացվող՝ գյուղատնտեսական մշակաբույսերով ու բազմամյա տնկարկներով զբաղեցված տարածքները: Արմեն Ներսիսյանը խոսեց նաև առաջիկայում նախատեսվող մի շարք աշխատանքների մասին, որոնք ուղղված են արտեզյան խորքային հորերի, պոլիէթիլենային հիդրոմեկուսիչ ծածկոցով ջրամբարների կառուցման, պոմպակայանների կառուցման աշխատանքներին:

Ապա գյուղնախարարության ներկայացուցիչները սպառիչ պատասխաններ տվեցին ներկաների բարձրացված հարցերին և լսեցին նրանց առաջարկությունները:

Ասկերանի շրջվարչակազմի ղեկավարը կարևորելով օրվա միջոցառումը՝ նշեց.

-Ցանկանում եմ շնորհակալություն հայտնել այն համայնքների ղեկավարներին, որոնք հավուր պատշաճի են կատարում իրենց պարտականությունները՝ իրենց դրսևորելով որպես օրինապաշտ և կարգապահ ղեկավարներ: Մեր շարքերում արտոնյալ մարդիկ չկան, և յուրաքանչյուրը պետք է առաջին հերթին իր ուշադրությունը սևեռի կարգապահության վրա:

Մեր նախորդ հանդիպումից քիչ ժամանակ է անցել և ինչպես նկատել եք, ընդամենը մի քանի օր առաջ արված ձեր առաջարկություններն արդեն նախագծեր են դարձել և օրեր հետո կդառնան հստակ ծրագրեր ու կհասնեն համայնքներ: Բնակչությունը պետք է կարողանա օգտվել այդ ծրագրերից, ինչի դեպքում համայնքներն, անշուշտ, կզարգանան ու կբարգավաճեն:

Մեր բռնած ուղին թափանցիկ է բոլորի համար, հավաստիացնում եմ, որ ձեր բարձրացված հարցերն ու առաջարկությունները տեղ են հասնում և ստանում համապատասխան լուծումներ: Կրկին շեշտում եմ՝ մենք բոլորս պետք է պատրաստ լինենք ծառայելու մեր ժողովրդին:

Կարինե ԲԱԽՇԻՅԱՆ