Հուլիսի 7-ին Ասկերանի նորակառույց մարզադաշտում տեղի ունեցավ ֆուտբոլային առաջին պաշտոնական  մրցախաղը: ԼՂՀ պատանեկան առաջնության շրջանակում դաշտ էին դուրս եկել Ասկերանի ՙԲերդ՚ եւ Հադրութի ՙԴիզակ՚ թիմերը: Ինչպես եւ կանխատեսվում էր, ասկերանցիները բացարձակ առավելություն ունեցան հադրութցիների նկատմամբ. խաղն ավարտվեց 7-0 հաշվով, հոգուտ ՙԲերդի՚: Ընդ որում երկու հոգի` Սերգեյ Հովսեփյանը եւ Վիգեն Հարությունյանը, դարձան հեթ-տրիկի հեղինակներ, իսկ  7-րդ համարի տակ հանդես եկող Տիգրան Դանիելյանը խփեց խորհրդանշական 7-րդ գոլը:
Գուցե 7 թվերի խորհուրդն ընդամենը զգայական նշանակություն ունի եւ այդ համընկնումը պատահականություն էր, սակայն ասկերանցի ֆուտբոլիստների համոզիչ հաղթանակը մրցակցի նկատմամբ` պատահական անվանել չես կարող: Ասել է թե` ՙԲերդի՚ մեկնարկը խիստ հուսադրող է, եւ առաջիկայում մեր թիմի նոր հաղթանակներով հրճվելու բերկրանքը կունենանք:

Նկատենք, որ մինչ այդ  ՙԲերդը՚, դարձյալ պատանեկան հանրապետական առաջնության շրջանակում, եւս մեկ հանդիպում է ունեցել Բերձորում` տեղի թիմին հաղթելով 9-0 հաշվով: Չկասկածենք մեր սիրելի թիմի հետագա հաջողություններին ու չմոռանանք նաեւ մեր ակտիվ ներկայությամբ քաջալերել նրանց: ՙԲերդի՚ հաղթանակը` բոլորիս հաղթանակն է: