Սիրելի ժողովուրդ, մենք կրկին Մայիսյան Եռատոն ենք նշում։ Ինչի կապակցությամբ շնորհավորում եմ բոլորիս՝ գլուխ խոնարհելով նահատակված մեր հերոս տղաների հիշատակի առաջ։ Եթե առնվազն 100 տարի մեր պատմության անիվը հետ շրջենք, ապա կտեսնենք, որ մինչև 1921 թվականը մենք միշտ էլ պատերազմի թատերաբեմում ենք գտնվել։ Խորհրդային 70 տարիները ժամանակավոր դադար էին հանդիսացել։ Իսկ 88-ին մեր արդար պահանջի սկիզբը դրվեց։ 1994 թվականին մենք արդեն մեր կամքն էինք թելադրում թշնամուն, որը հրադադար խնդրեց։ Կնքվեց մի փաստաթուղթ, որն իմ կարծիքով ներկայում ոչ մի իրավական ուժ չունի։ Դա է թերևս պատճառը, որ թշնամին ցանկացավ հանկարծակիի

բերել մեզ և բլից-կրիգի միջոցով հաջողության հասնել։ Սակայն նրանք սխալ հաշվարկներ էին արել։ Հաշվի չէր առնվել հայ զինվորի անմնացորդ նվիրումն ու ազատ ու անկախ Հայրենիքում ծնված ու մեծացած քաջ մարտիկների հայրենասիրական ոգին ու շունչը։ Թշնամին կրկին հանդիպեց հայ զինվորի բազկի ուժին՝ մեկ անգամ ևս համոզվելով, որ անհնարին է հաղթել ղարաբաղցուն։ Աշխարհում չկա որեւէ ուժ, որը կարող է հաղթել այս ժողովրդին, քանզի մեր ուժը նաև մեր միասնության ու համախմբվածության մեջ է։

Հաշվի առնելով այն, որ թշնամին նույն դավադիրն է մնացել, մենք միշտ պետք է պատրաստ լինենք նման դեպքերի։ Անընդհատ պետք է հետաքրքրվենք զինվորի առօրյայով, հաճախակի դիրքեր ու սահմանապահ զինվորներին այցելենք։ Մեր զինվորները, կարծում եմ, դրա կարիքն ունեն։  Ինչ վերաբերում է ապրիլյան օրհասական օրերին մեր ժողովրդի համախմբման ու մի բռունցք դառնալուն, ապա դա ուղղակի բառերով չես կարող արտահայտել։ Իսկ ինչքա՜ն էին դրանից ոգևորվում մեր զինվորները։ Մեր համախմբվածության հետ հաշվի նստեց ամբողջ աշխարհը, ինչի համար իմ խորին շնորհակալությունն եմ հայտնում ամբողջ աշխարհի հայերին։  Իսկ որ Ադրբեջանն իր որդեգրած անքաղաքակիրթ վարվելաձևով վերանալու է աշխարհի քաղաքական քարտեզից՝ չեմ կասկածում։

Կոչ եմ անում իմ ժողովրդին՝ միշտ լինել այսպես համախմբված ու միասնական, քանզի հայ ժողովուրդն իր միասնության շնորհիվ է միշտ հաղթանակներ կռել։ Իսկ մենք պարտվելու իրավունք չունենք, քանզի բավական թանկ էր հաղթանակի գինը։

Կրկին անգամ գլուխ եմ խնորհում որդեկորույս մայրերի առաջ, որոնց որդիների սուրբ արյամբ պաշտպանվեց Հայրենիքը։

Շնորհավոր Եռատոն։