Օգոստոսի 8-ից մայրաքաղաք Ստեփանակերտի  Ստեփան Շահումյանի անվան մարզադաշտում մեկնարկեց մանկապատանեկան ֆուտբոլի հանրապետական առաջնություն, որին մասնակցում էին Ստեփանակերտի և հանրապետության շրջանների հավաքական թիմերը։ Խաղերն ընթացան երեք փուլով։ Ասկերանի ֆուտբոլի հավաքականը՝ մարզիչ Հայկ Շամիրյանի գլխավորությամբ, ամենայն լրջությամբ էին նախապատրաստվել հանրապետական մրցույթին՝ եզրափակչում հայտնվելու և շրջանի անունը բարձր պահելու աննկուն ոգով։ Դա է թերևս վկայում այն, որ թիմն առաջին մրցափուլում  գլխավորում էր իր խմբի աղյուսակը՝ և առավելագույն 7 միավորով (9 հնարավորից) ապահովեց իր հաստատուն տեղը կիսաեզրափակչում։ Կիսաեզրափակիչ փուլում խաղալով Մարտակերտի հավաքականի հետ 1։0 հաշվով հաղթանակ տանելով՝ հայտնվեց եզրափակչում։ Մանկապատանեկան ֆուտբոլի հանրապետական առաջնության եզրափակիչ խաղը տեղի ունեցավ օգոստոս 20-ին։ Մարտակերտի և Ստեփանակերտ 2 հավաքական թիմերը մրցապայքարի էին ելել 3րդ մրցանակային տեղի համար։ Խաղն ավարտվեց 6։3 հաշվով՝ հօգուտ Ստեփանակերտ 2 թիմի։ Համառ և անզիջում պայքար էր ծավալվել Ասկերանի և Ստեփանակերտ 1 հավաքականների միջև։ Առաջին խաղակեսն ավարտվեց դաշտի տերերի առավելությամբ և թիմերն ընդմիջման գնացին 4։1 հաշվով։ 2-րդ խաղակեսում մեծ ակտիվություն ցուցաբերեցին ասկերանցիները՝ խաղի հաշիվը կրճատելով ևս երկու գնդակով։ Չնայած Ասկերանի հավաքականի խաղացողների ինքնանվիրումի և խաղադաշտում լավագույնս դրսևվորվելուն՝ խաղն ավարտվեց 4։3 հաշվով։

Նույն օրը տեղի ունեցավ 1-ին, 2-րդ և 3-րդ մրցանակային տեղերը զբաղեցրած՝ համապատասխանաբար Ստեփանակերտ 1, Ասկերանի և Ստեփանակերտ 2  թիմերի պարգևատրման հանդիսավոր արարողությունը։ Թիմերին մրցանակները՝ պատվոգրեր և դրամական պարգևներ հանձնեցին ֆուտբոլի Արցախի հավաքականի թիմի գլխավոր մարզիչ Մհեր Ավանեսյանն ու Լեռնային Արցախ ՖԱ գլխավոր մարզիչ Սլավա Գաբրիելյանը։ Դրամական պարգևներ ստացան նաև մրցանակային տեղեր զբաղեցրած թիմերի մարզիչները։ Առաջնության կազմակերպիչները մրցանակներ էին պատրաստել նաև անհատական անվանակարգերում։ Մրցանակներ ստացան լավագույն հարձակվողը, կիսապաշտպանն ու դարպասապահը։ Ասկերանի հավաքական թիմի անդամ Յուրա Բեգլարյանը  մրցանակ ստացավ լավագույն կիսապաշտպան անվանակարգում՝ արժանանալով պատվոգրի և հուշանվերի։

Ինչպես նշեց Սլավա Գաբրիելյանը բոլոր թիմերն էլ մեծ ակտիվություն էին ցուցաբերել և մանկապատանեկան ֆուտբոլի առաջնության կազմակերպիչները հասել են իրենց նպատակին։

-Դիտարժան ու գրագետ խաղ ցուցադրեց Ասկերանի հավաքականը, ինչը մարզիչ Հայկ Շամիրյանի նվիրվածության և քրտնաջան աշխատանքի արդյունք էր։ Սա մեզ համար մեծ անակնկալ էր, ինչի համար մեր շնորահակալությունն ենք հայտնում շրջանի ղեկավարությանը և մարզչին։ Ասկերանում մարզադաշտի կառուցումով  ֆուտբոլ մարզաձևը, կարելի է ասել, բարձր հիմքերի վրա դրվեց ,- ասաց Ս. Գաբրիելյանը։

Թերևս, ինչպես նշում են Ասկերանի հավաքականի պատանիները, նրանք սիրելով ու հարգելով իրենց մարզչին ու գնահատելով նրա նվիրվածությունն ու հոգատարությունը թիմի յուրաքանչյուր անդամի հանդեպ ջանում էին առավելագույնս դրսևորվել կարևորագույն այդ առաջնությունում։ Թերևս, երկրորդ հորիզոնականը զբաղեցնելը ևս լավ ցուցանիշ է, իսկ ապագայում կձգտեն ավելիին։

Կարելի է հստակ ասել, որ Ասկերանում մարզադաշտի կառուցումը շրջադարձային եղավ Ասկերանի ֆուտբոլի պատմության մեջ։

           Անահիտ ՊԵՏՐՈՍՅԱՆ

Լուսանկարները՝ ՎԱԼԵՐԻ ՊԵՏՐՈՍՅԱՆԻ