Օգոստոսի 12-ին Ասկերանի մշակույթի տանը կազմակերպվեց ինտելեկտուալ խաղ նվիրված երիտասարդության միջազգային տոն օրվան: Ներկա էին Ասկերանի շրջվարչակազմի աշխատակազմի մշակույթի բաժնի վարիչ Ռուզաննա Մկրտչյանը, կրթության բաժնի վարիչ Շահեն Աղաբաբյանը, §Ասկերանի շրջանի ուսումնական հաստատությունների տնօրինություն¦ ՊՈԱԿ տնօրեն Կառլեն Մայիլյանը:

Մրցույթին մասնակցում էին Ասկերանի շրջվարչակազմի, Ասկերանի  քաղաքային, Իվանյանի, Խնապատի, Աստղաշենի, Նախիջևանիկի, Այգեստանի,

Խրամորթի գյուղական համայնքների թիմերը:

Բացման և ողջույնի խոսքով հանդես եկավ Ռուզաննա Մկրտչյանը.

-Երիտասարդության միջազգային տոն օրը մեծ նշանակություն և կարևորություն ունի բոլորիս համար, քանզի միշտ էլ երիտասարդությունը եղել և մնում է մեր հասարակության շարժիչ ուժը: Այսօր մենք ուրախ և հպարտ ենք, որ մեր շրջապատում ունենք այսպիսի զարգացած, կրթված և հայրենասեր երիտասարդներ: Նրանք են մեր ազգային անվտանգության երաշխավորները: Այս ապրիլյան պատերազմում նրանք բազում հերոսական սխրանքներ կատարեցին և ապացուցեցին, որ ամուր են կանգնած այս հողի վրա` պաշտպանելով իրենց օջախները, մայրերին ու հարազատներին: Մեր երիտասարդները քաջաբար ցույց տվեցին, որ իրենք են այս հողի ու երկրի տերը: Տոնի կապակցությամբ շնորհավորում եմ երիտասարդությանը, մաղթում անկոտրում կամք, միշտ առաջ գնալու վճռականություն և հաջողություններ բոլոր նախաձեռնություններում:

Խաղավար Նինել Գաբրիելյանը նույնպես շնորհավորեց երիտասարդությանը և նշեց, որ նմանատիպ մրցույթների նպատակը երիտասարդների մտավոր կարողությունների զարգացումը և ինտելեկտուալ մակարդակի բարձրացումն է, նրանց հանգստի և ազատ ժամանցի նպատակային ու արդյունավետ կազմակերպման ընթացքում երիտասարդների համախմբումն ու նոր կապերի ստեղծումը:

Մրցույթն անցավ երեք փուլով, ամեն մի փուլին առաջադրվեց 10 հարց, որոնք  հետաքրքիր և տրամաբանական հարցեր էին: Խաղն անցավ անկաշկանդ և ակտիվ մթնոլորտում: Զգացվում էր, որ թիմերից յուրաքանչյուրը պայքարի մեջ մտնելով` ամեն կերպ ջանում էր հաղթել ու բարձր պահել հարազատ համայնքի անունը:

Ամեն մի փոլից հետո  հանձնախումբը հաշվում էր թիմերի ձեռք բերված միավորները: Վերջնական արդյունքներով մրցանակային 1-ին, 2-րդ և 3-րդ տեղերը զբաղեցրին համապատասխանաբար Ասկերանի քաղաքային, Աստղաշենի և Իվանյանի համայնքների թիմերը:

Հաղթող թիմերն Ասկերանի շրջվարչակազմի կողմից ստացան պատվոգրեր և դրամական պարգևներ:

Նշենք, որ ինտելեկտուալ խաղն ուղղորդվում էր Ասկերանի §Բերդ¦ համույթի հիանալի կատարումներով, ինչն ավելի էր ոգևորում և ուրախ տրամադրություն հաղորդում երիտասարդությանը:

Կարինե ԲԱԽՇԻՅԱՆ