Նոյեմբերի 16-ին Բերքաձորի հիմնական դպրոցում մշակույթի տան  ու դպրոցի հետ համատեղ անցկացվեց Ռոբերտ Աբաջյանի ծննդյան 20- ամյակին նվիրված հուշ - ցերեկույթ: Երեխաները և պատանիները մեկ մարդու նման պատրաստվել էին: Նրանք էլ գիտակցում էին միջոցառման հույժ կարևորությունը: Այն անցկացվեց մի քանի փուլով: Ողջույնի խոսքը  դպրոցի զինղեկ, մայոր Ա. Մայիլյանինն էր: Նա ողջունեց ներկա գտնվողներին և իր ոգևորող ելույթով արդրադարձ կատարեց հայոց պատմության փառահեղ էջերին։ Այնուհետև նրանք ծանոթացան մեր հերոսի կյանքին և նրա  անցած մարտական ուղուն։  Իհարկե բոլորս հուզված  էինք , սակայն բոլորիս  սրտում էլ ուրախություն կար, հպարտություն և վաղվա օրվա հավատ։ Ռոբերտ Աբաջյանը մեծ օրինակ եղավ բոլորիս համար։ Երբ մարդ իր անձը դնում է մի կողմ և մտածում է Հայրենիքի և ընկերների մասին։ Դա նշան է անսահման սիրո  ու հարգանքի առ  Հայրենիքի ու ընկերոջ։

Ցերեկույթի երկրորդ մասում երեխաները արտասանեցին և երգեցին բանաստեղծություններ և երգեր  նվիրված մեր հերոսին, այնուհետև Ա. Մայիլյանը հայտարարեց դպրոցի տնօրենի հրամանով անցկացված Ռոբերտ Աբաջյանի 20- ամյակին նվիրված  հրաձգության մրցույթի հաղթողների անունները։ Երկու տարիքային խմբերում առաջին տեղը զբաղեցրած աշակերտներ Դավիթ Հայրիյանը և Գառնիկ Պետրոսյանը պարգևատրվեցին պատվոգրերով և արժեքավոր նվերներով, իսկ երկրորդ և երրորդ տեղերը զբաղեցրած աշակերտները ստացան  խրախուսական պատվոգրեր։

Ցերեկույթի ավարտին բոլորս ծաղիկներ դրեցինք Արցախյան պատերազմում զոհված հերոսների  հիշատակին կառուցված համալիրում։

Վստահ եմ, որ  միջոցառմանը մասնակցած ամեն մի աշակերտ տուն գնաց մի մեծ հայրենասիրական դաս ստացած ու ոգևորված՝ քաջ գիտակցելով, որ նրանք են մեր երկրի հաջորդ Աբաջյանները՝ խիզախ, տոկուն ու անպարտելի։

Անի ԽԱՉԱՏՐՅԱՆ

գ. Բերքաձոր