Արցախի Հանրապետության Սահմանադրության հանրաքվեի և մեծամասնական կարգով պատգամավորական արտահերթ ընտրություններն Ասկերանի շրջանում  անցնում են ժողովրդավարական նորմերին համապատասխան և օրենքով սահմանված կարգով։ Շուրջ մեկ ամիս տևած քարոզարշավն անցավ առանց որևէ միջադեպի։ Ինչը խոսում է այն մասին, որ Արցախում արմատավորվել է ժողովրդավարական ընտրություններ անցկացնելու հարուստ փորձ։ Այդ մասին դիտորդների հետ հանդիպումներում փաստեցին նաև դիտորդական առաքելություն իրականացնող բազմաթիվ պետությունների ներկայացուցիչներ՝ այն համեմատելով Եվրոպայում տեղի ունեցող ընտրությունների մակարդակի հետ։

Ինչպես տեղեկացրեց Տարածքային ընտրական հաձնաժողովի նախագահ Կարեն Միրզոյանը ժամը 17- ի դրությամբ շրջանի 6756 ընտրող արդեն կատարել էր իր քաղաքացիական պարտքը, որը կազմում է ընտրողների 77,4 տոկոսը։ Կարելի է փաստել, որ Ասկերանի շրջանում սահմանադրության

հանրաքվեն և պատգամավորական ընտրություններն արդեն կայացել են։  Կարեն Միրզոյանը տեղեկացրեց, նաև որ համար 5 ընտրատարածքի բոլոր տեղամասերում ընտրություններն ընթանում են բավականին ակտիվ, որևէ բողոք կամ ընտրությունների և հանրաքվեի ընթացքը խոչընդոտող դեպք տարածքային ընտրական հաձնաժողովում չի գրանցվել։

Ասկերան քաղաքի համար 5/1 ընտրական տեղամասում ժամը 17-ի դրությամբ ընտրություններին և Սահմանադրության հանրաքվեին մասնակցել էր արդեն շուրջ 1062 ընտրող։ Ընտրողների ընդհանուր թիվն այստեղ 1620 է։ Ընտրությունների ընթացքին հետևում  են մեծամասնական ընտրակարգով առաջադրված թեկնածուների վստահված անձինք, ինչպես նաև դիտորդներ հանրապետությունում գործող տարբեր կուսակցություններից։

Անահիտ ՊԵՏՐՈՍՅԱՆ