Անգութ  մահը  մեր  շարքերից  խլեց սրտացավ ղեկավար ու գործընկեր, արհեստավարժ մասնագետ, ընտանիքի նվիրյալ Շահեն Աղաբաբյանի  կյանքը:

Ծնվել է 1957թ. օգոստոսի 15-ին, Ասկերանի շրջանի Խնապատ գյուղում:  1964թ.  ընդունվել է Խնապատի  միջնակարգ դպրոցը, 1971-1972 ուստարում տեղափոխվել է Ստեփանակերտի թիվ 1 գիշերօթիկ  դպրոցը, այն ավարտել 1974թ.:   1975թ.  ընդունվել է Ստեփանակերտի մանկավարժական ինստիտուտի  ֆիզիկայի բաժինը`  1979թ.  ավարտել այն:    Նույն  թվականին նշանակվել է 

Խնապատի   միջնակարգ դպրոցը`  որպես ֆիզիկայի ուսուցիչ:   1984թ.   նշանակվել է  նույն դպրոցի  փոխտնօրեն:  1988թվականից մասնակցել է   արցախյան շարժմանը:

1991 թվականից ընդգրկվել է Խնապատի ինքնապաշտպանական ջոկատում,  իսկ  1992թ. սեպտեմբերի 1-ից   զորակոչվել է ԼՂՀ  ՊԲ:  1993-1994 թթ.  զբաղեցրել  է 4-րդ  պաշտպանական շրջանի  հակաօդային պաշտպանության պետի  պաշտոնը:

1995թ.  մայիս  ամսից  նշանակվել է ժողկրթության,  մշակույթի  և  սպորտի  բաժնում`   սկզբից   գլխավոր  մասնագետ,   հետագայում    բաժնի  վարիչի   տեղակալ  և  բաժնի վարիչ:  1997թ.   նշանակվել է  վարչակազմի  մշակույթի բաժնի վարիչ:

2012թ.  մարտից  ղեկավարում է Ասկերանի վարչակազմի աշխատակազմի  կրթության և սպորտի բաժինը:

Շ.Աղաբաբյանը  շրջանի ֆիզիկայի լավագույն մասնագետներից  էր:   Մշակույթի և  կրթության ոլորտներում,   Շ.Աղաբաբյանը իրեն դրսևորել է  որպես   բարձրակարգ  մասնագետ  ու  ղեկավար:  Տիրապետում էր   ղեկավարման նրբություններին, ինչի   արդյունքում նրա   ղեկավարած  բաժինների աշխատանքը  միշտ  արդյունավետ ու նպատակասլաց էր:  Ուշադրության կենտրոնում մատաղ սերնդի կրթության    ու  դաստիարակության հարցն էր,   մանկավարժների սոցիալական  պայմանների բարելավումը,  դպրոցների նյութատեխնիկական   բազայի հարստացումը   և  ընդհանրապես   հանրակրթության հետ  կապված  բոլոր  հարցերը:

Շահեն Աղաբաբյանը պարգևատրվել է §Արիություն¦ մեդալով, վարչապետի հուշամեդալով, բազմաթիվ պատվոգրերով, շնորհակալագրերով։

Շահեն Աղաբաբյանի հիշատակը միշտ վառ կմնա գործընկերների,  մանկավարժների,  նրան   ճանաչողների   սրտերում:

 Ասկերանի շրջանի վարչակազմ

Կրթության և սպորտի բաժին