|
01.11.2017 16:07 |
|
 Վերջերս Ասկերանում անցկացվել է աթլետիկայի շրջանային առաջնությունը՝ դպրոցականների միջև։ Առաջնությանը մասնակցել են Այգեստանի, Ասկերանի, Խնապատի, Նախիջևանիկի, Նորագյուղի և Պատարայի միջնակարգ դպրոցների հավաքական թիմերը: Յուրաքանչյուր թիմի կազմում ընդգրկված էր 5 պատանի և 5 աղջիկ: Մասնակիցները իրենց ուժերը չափեցին 100մ, 200մ, 400մ, 800մ վազքատարածություններում, փոխանցումավազքում ու թափավազքով
հեռացատկում: Զգալիորեն գերազանցելով բոլոր մրցակիցներին՝ մրցանակային 1-ին տեղը գրավեց և շրջանի աթլետիկայի չեմպիոն հռչակվեց Նորագյուղի Վիտալի Պետրոսյանի անվան միջնակարգ դպրոցի թիմը (մարզիչ՝ Վանյա Պետրոսյան): 2-րդ տեղը բաժին հասավ Ասկերանի Էդմոն Բարսեղյանի անվան միջնակարգ դպրոցի թիմին, իսկ Խնապատի Արթուր Հայրապետյանի անվան միջնակարգ դպրոցի թիմը զբաղեցրեց մրցանակային 3-րդ հորիզոնականը: Ուշագրավ էր, որ 12 հատ 1-ին տեղերից 8-ը գրավել են նորագյուղցիները: Մրցանակային տեղեր զբաղեցրած թիմերը շրջվարչակազմի կողմից արժանացել են պատվոգրերի, իսկ հաղթող թիմը նաև դրամական պարգևի:
Թամար ՊԵՏՐՈՍՅԱՆ |
