Ասկերանի շրջանում պարբերաբար կազմակերպվում են սպորտային միջոցառումներ Արցախյան պատերազմի հաշմանդամ ազատամարտիկների մասնակցությամբ:

Ասկերանի շրջվարչակազմի աշխատակազմի կրթության և սպորտի բաժնի կողմից նոյեմբերի 3-ից 4-ը կազմակերպվեց շախմատի շրջանային առաջնություն, որին մասնակցում էին 8 հաշմանդամ ազատամարտիկներ: Առաջին մրցանակային տեղն զբաղեցրեց Գագիկ Մուսայելյանը/Ակնաղբյուր/, երկրորդ տեղը՝ Արտիկ Հայրապետյանը/Ակնաղբյուր/, երրորդ տեղը՝ Վանյա Պետրոսյանը/Նորագյուղ/: Հաղթողները պարգևատրվեցին

շրջվարչակազմի ղեկավարի պատվոգրերով և դրամական պարգևներով:

Նոյեմբերի 9-ից 10-ը կրթության բաժնի և Ասկերանի շրջանի արհմիության համատեղ ուժերով կազմակերպվեց հաշմանդամ ազատամարտիկների միջև նարդու շրջանային առաջնություն՝ 10 ազատամարտիկների մասնակցությամբ: Առաջին տեղն զբաղեցրեց Սամվել Շահրամանյանը/Խնապատ/, երկրորդ տեղը՝ Վանյա Հայրապետյանը/Ասկերան/, երրորրդ տեղը՝ Սամվել Մեժլումյանը /Ասկերան/: Նրանք պարգևատրվեցին պատվոգրերով և դրամական պարգևներով, իսկ բոլոր մասնակիցներն Ասկերանի շրջանի արհմիության նախագահ Գայանե Գաբրիելյանի կողմից ստացան հուշանվերներ:

Ինչպես տեղեկացրեց մեզ Ասկերանի շրջվարչակազմի աշխատակազմի կրթության և սպորտի բաժնի գլխավոր մասնագետ Գրիգորի Մարտիրոսյանը՝ նման միջոցառումները մեծ նշանակություն ունեն հաշմանդամ ազատամարտիկների համար: Բացի ակնհայտ ոգևորությունից, նրանք ստանում են նաև հոգեբանական մեծ օգնություն: Երկու, երեք օր տևող այդ հանդիպումներից ազատամարտիկները հեռանում են բարձր տրամադրությամբ և նորից հանդիպելու ջերմ մտադրությամբ:

Գրիգորի Մարտիրոսյանը տեղեկացրեց նաև, որ ԱՀ ԿԳ և սպորտի նախարարության նախաձեռնությամբ նոյեմբերի 6-ից 10-ը Ստեփանակերտում անցկացվել էր դպրոցականների 7-րդ սպարտակիադայի ծրագրով պատանիների միջև հանդբոլի հանրապետական առաջնություն: Մեր շրջանից մասնակել է Իվանյանի Օնիկ Գրիգորյանի անվան միջնակարգ դպրոցի թիմը /մարզիչ՝ Հրանտ Շեկյան/: Թիմը գրավել է երկրորդ մարցանակային տեղը և արժանացել դիպլոմի, մեդալի ու գավաթի:

Կարինե ԲԱԽՇԻՅԱՆ