Ի կատարումն Արցախի Հանրապետության նախագահ Բակո Սահակյանի և Ասկերանի շրջվարչակազմի ղեկավար Սերգեյ Գրիգորյանի հանձնարարականների՝ շրջանում ապրիլ և մայիս ամսիները հայտարարվել են բարեկարգման, սանիտարական մաքրման և ծառատնկման աշխատանքների կազմակերպման և անցկացման ամիսներ։ Այս աշխատանքները համակարգողների կողմից շրջանում շարունակվում են այցելությունները համայնքներ պարզելու, թե ինչպիսի աշխատանքներ են իրականցվում, նաև օժանդակություն ցուցաբերելու համար։ Թե ինչպիսի աշխատանքներ են կատարվել այդ շրջանակներում՝ փորձեցինք պարզել շրջվարչակազմի ղեկավարի տեղակալ Սամվել Հայրիյանից։

-Պարոն Հայրիյան, շրջանում հայտարարված բարեկարգման, սանիտարական մաքրման և ծառատնկման աշխատանքների շրջանակներում ինչպիսի՞ աշխատանքներ են իրականացվել։

- 2018թ. ապրիլի 6-ի Արցախի Հանրապետության նախագահի կողմից տրված հանձնարարականի համաձայն շրջանի համայնքների, հիմնարկ-ձեռնարկների տնօրենների մասնակցությամբ տեղի է ունեցել խորհրդակցություն, որի ընթացքում վարչակազմի ղեկավար Սերգեյ Գրիգորյանը կոնկրետ հանձնարարականներ է տրվել, այդ աշխատանքները բարեխղճորեն կատարելու վերաբերյալ։ Նշված ժամանակաընթացքում կատարվել են որոշակի աշխատանքներ։  Ասկերանից դեպի Մարտակերտ տանող ճանապարհի երկայնքով՝ 6,5կմ երկարությամբ, տնկվել է մոտ 1300 դեկորատիվ տեսակի ծառ։ Նշված ժամանակահատվածում ձեռնամուխ ենք եղել ԱՀ նախագահի նախընտրական ծրագրով նախատեսված սահմանամերձ Փառուխի, Խրամորթի, Նախիջևանիկի, Վարդաձորի, Սառնաղբյուրի համայնքներում գյուղամիջյան ճանապարհների բարեկարգման, հենապատերի կառուցման և հետագայում սալահատակման աշխատանքների իրականացմանը։ Բոլոր համայնքներում կատարվել են սանիտարական մաքրման աշխատանքներ և աղբահանություն։ Շրջանում նորաստեղծ §Խաչենշին¦ ՓԲ ընկերության կողմից համայնքներում իրականացվել են աղբատեղերի, փոսորակների և արգելափակոցների կառուցման աշխատանքներ և ներկա դրությամբ գործընթացը շարունակվում է։ Զգալի աշխատանքներ են կատարվել շրջանի վարչական տարածքում գտնվող բոլոր հուշարձանների, հուշաղբյուրների, հասարակական վայրերի սանիտարական մաքրության, բարեկարգման և կանաչապատման ուղղությամբ։ Նշված աշխատանքներում ընդգրկվել են շրջանի բնակչությունը, դպրոցական կոլեկտիվները և հիմնարկ-ձեռնարկությունները։Բոլոր համանյքներում կատարվել են ծառատնկման աշխատանքներ, հուշարձանների տարածքների բարեկարգման և մաքրման աշխատանքներ, որոնք դեռևս ընթացքի մեջ են գտնվում։

-Գոհացուցի՞չ են իրականացված աշխատանքների արդյունքները։

-Դիտարկելով կատարված աշխատանքները, ակնհայտորեն երևում է, որ դրական արդյունքն առկա է,  ձեռնարկված քայլերը՝ գոհացուցիչ։ Թերևս, նշված աշխատանքներում կան բացթողումներ, որոնք հիմնականում կապված են աղբահանության կազմակերպման հետ։

-Կա՞ն համայնքներ, որոնք թերացել են նշված հարցերում։

-Բոլոր համայնքներում ձեռնարկվել են համապատասխան միջոցներ և կազմակերպվել մրջոցառումներ, որոնց ընթացքում յուրաքանչյուր մասնակից քաջ գիտակցելով նման աշխատանքների կարևորությունն ու անհրաժշտությունը՝ իր ուժերի ներածին չափով  մասնակցություն է ունեցել հարազատ բնակավայրի բարեկարգման աշխատանքներին։

Շոշափելի աշխատանքներ են իրականացվել նաև միջպետական և հանրապետական նշանակության ավտոճանապարհների երկայնքով, մասնավորապես Ստեփանակերտ-Ասկերան ճանապարհահատվածում։

-Այդ աշխատանքներն իրականացնելու համար պետական աջակցություն եղե՞լ է։

- Անշուշտ,  դրանք, հիմնականում, կատարվել են պետական աջակցությամբ։

-Պարոն Հայրիյան, ինչպե՞ս կբնութագրեք համայնքների ներկայիս վիճակը։

- Եթե զուգահեռներ անցկացնենք համայնքների նախկին վիճակի հետ, ապա  ներկայիս վիճակն առավել բարվոք է և մեր կողմից ձեռնարկվում են անհրաժեշտ բոլոր  միջոցները՝ շրջանի բնակավայրերի, շրջակա միջավայրի սանիտարական վիճակը բարձր մակարդակի հասցնելու և պահպանելու ուղղությամբ։

Հարցազրույցը՝ Անահիտ ՊԵՏՐՈՍՅԱՆԻ