Ինչպես տեղեկացանք Ասկերանի շրջանի վարչակազմի աշխատակազմի գյուղատնտեսության բաժնից 2018 թվականի բերքահավաքը շրջանում սկսվել է ժամանակին և այժմ այն գտնվում է ավարտական փուլում։ Շրջանի տարածքում աշխատում է 6 կոբայն, որոնք լրիվությամբ բավարարում են պահանջարկը։ Շրջանում 2018 թվականի բերքի տակ ընդհանուր առմամբ կատարվել է աշնանացան և գարնանացան մշակաբույսերի 15573 հա ցանքս։ Այդ ցանքատարածությունների գերակշիռ մասը՝ 11613հա կազմում են  աշնանացան մշակաբույսերը, որից 8840.2 հա ցորեն և 2772.7հա գարի։ Գարնանացան մշակաբուսերի անվան տակ ցանվել է հաճար, եգիպտացորեն, արևածաղիկ, հնդկացորեն, սոյա։ Տեխնիկական մշակաբույսերից հլածուկ և կտավատ, ընդեղենից՝ սիսեռ։ Կատարվել է շուրջ 500հա բանջարաբոստանային կուլտուրաների և 36հա բանջարապարենային մթերքների ցանքս։

Ներկայում ամբողջությամբ ավարտված է գարու, ցորենի, եգիպտացորենի, արևածաղկի, հլածուկի, կտավատի և սիսեռի բերքահավաքը։ Դեռևս ընթացքի մեջ է հաճարի և հնդացորենի բերքահավաքը։ Հնձված 11810.5հա ցանքատարածություններից ամբարվել է 23272.3 տոննա համախառը բերք։ Ցորենի միջին բերքատվությունը շրջանում կազմել է 20.8ցենտներ, գարու միջին բերքատվությունը՝ 18.7ց։ Ամարասում 38 հա ցանված հլածուկից ստացվել է 57 տոննա բերքը, միջին բերքատվությունը կազմել է 15 ցենտներ։ Շրջանում ցանված 34հա արևածաղկի, 108հա կտավատի և 4.5հա սիսեռի մշակաբույսերից համապատասխանաբար ստացվել է 38տ, 57տ և 4.3տ բերք։

Բնական աղետներից տուժած 871հա ցանքատարածությունների նկատմամբ կազմվել են համապատասխան ակտեր՝ տարանջատելով տուժման աստիճաններն ըստ կատեգորիաների։ Բավականին վնաս են կրել ցորենի ցանքատարածությունները՝ 716հա։ Անձրևների և սելավների պատճառով նյութական վնասներ են կրել Ասկերանում 300 քառակուսի մետր, իսկ Ուղտասարում 1440 քառակուսի մետր տարածքով ջերմոցներ։ Աղետների պատճառով բավականին տուժել են նաև տնամերձեր և այգիներ շրջանի տարբեր համայնքներում։

Բերքահավաքի աշխատանքները մոտենում են ավարտին, դրան զուգահեռ կատարվում են նաև գյուղատնտեսական այլ աշխատանքներ։

Անահիտ ՊԵՏՐՈՍՅԱՆ