Արցախը մի իսկական թանգարան է բաց երկնքի տակ, այն  հարուստ է հազարավոր հինավուրց պատմական, հնագիտական, ճարտարապետական հուշարձաններով ու խաչքարերով, որոնք ստեղծվել են դարերի ընթացքում: Դրանք լուռ, միաժամանակ խոսուն վկաներն են մեր փառապանծ անցյալի ու ներկայի: Անշուշտ, այդ մշակութային արժեքների պահպանումը մեր բոլորիս պարտականություն է, ինքներս պետք է հոգանք մեր անգնահատելի

արժեքների մասին, զգանք դրանց կարևորությունը և այն գեղեցիկ մատուցենք օտարերկրյա մեր հյուրերին: Պետք է խոստովանել, որ վերջին ժամանակներս մեր պատմամշակութային արժեքների հանդեպ հետաքրքրություն են ցուցաբերում օտարազգի այցելուները և Սփյուռքի հայությունը՝ ինչը մեծ հպարտություն է արցախցիներիս համար, միաժամանակ բարձրացնում է նաև մեր պատասխանատվության զգացումները:

Պատմական արժեքների պահպանության և հետազոտման ուղղությամբ ակտիվ աշխատանքներ են իրականացվում նաև Ասկերանի շրջանում: <<Պատմական միջավայրի պահպանության պետական ծառայություն>> ՊՈԱԿ Ասկերանի շրջանային պետական ծառայության պետ Ալլա Արզումանյանը պարբերաբար աշխատանքներ է ձեռնարկում՝ լինելով շրջանի տարբեր պատմամշակութային վայրերում: Ինչպես նշեց ծառայության պետը, նա համագործակցում է շրջվարչակազմի ղեկավարության և համայնքների ղեկավարների հետ, ովքեր պատրաստակամություն են հայտնում աջակցություն ցուցաբերել իրեն:

Վերջերս Ա.Արզումանյանը, Ասկերանի <<Խաչենիշին >> ՓԲԸ տնօրինության աջակցությամբ, մի խումբ մարդկանց հետ այցելեց Վերին Ղլիժբաղ գյուղը և այդ տարածքում իրականացրեց մաքրման աշխատանքներ: Միահամուռ ուժերով մաքրեցին Սուրբ Մարիամ Աստվածածին եկեղեցին, Խաչին և Քյամանչին աղբյուրները, հին գերեզմանոցն ու գյուղատեղին:

Գործնականորեն տրամադրված Ալլա Արզումանյանը նման աշխատանքներ է իրականացնում նաև շրջանի մյուս համայնքներում:

Դե ինչ, ցանկանանք, որպեսզի մեր պատմամշակութային հարուստ արժեքները լինեն կանգուն և բարեկարգ վիճակում, իսկ համայնքների ղեկավարները շարունակեն համագործակցել <<Պատմական միջավայրի պահպանության պետական ծառայություն>> ՊՈԱԿ Ասկերանի շրջանային պետական ծառայության հետ՝ ի շահ մեր երկրի անվան ու նրա հարստության պահպանման:

Տեր կանգնենք տարբեր ժամանակներում ստեղծված մեր պատմամշակութային արժեքներին:

Կարինե ԲԱԽՇԻՅԱՆ