Մարտի 12-ին Ասկերանում մեկնարկեց <<Արծվիկ>> ռազմամարզական խաղերի շրջանային փուլը, որին մասնակցում էին Ասկերանի, Ավետարանոցի, Պատարայի, Իվանյանի, Խնածախի, Այգեստանի միջնակարգ դպրոցների թիմերը: Բացման հանդիսավոր արարողությանը մասնակցում էր Ասկերանի շրջվարչակազմի աշխատակազմի կրթության և սպորտի բաժնի վարիչ Կառլեն Մայիլյանը, գլխավոր մասնագետ

Գրիգորի Մարտիրոսյանը, դպրոցների զինղեկներ:

Կառլեն Մայիլյանը ողջունելով ներկաներին՝ կարևորեց այս խաղերի նպատակն ու նշանակությունը:

-Մեզանից յուրաքանչյուրը քաջ գիտակցում է, որ մենք ունենք դարավոր թշնամի, ով երբեք չի քնում: Հայրենիքի սահմանների պաշտպանությունը բոլորիս սրբազան պարտքն է, և հենց դրան են միտված այսօրինակ մրցույթների կազմակերպումը: Մեր պատանիները պարտավոր են հնարավորինս լավ նախապատրաստվել բանակին՝ լինելով ուժեղ, մարզված ու ողջամիտ:

Այսօր հավաքվել են մեր լավագույն ռազմական և ֆիզիկական պատրաստություն ունեցող դպորցականները, ովքեր ամիսներ ի վեր նախապատրաստվել են, որպեսզի մեզ ցույց տան իրենց հմտություններն ու կարողությունները: Ողջունելի է շարքերում տեսնել նաև տղաներին ոչնչով չզիջող այս խիզախ աղջիկներին:

Ձեզ մաղթում եմ ուժեղ և արդար պայքար, թող հաղթի ուժեղագույնը: Պետք է շեշտել որ բոլոր թիմերն էլ լավ էին նախապատրաստված և խաղերի ընթացքում դրսևորում էին բարձր պատրաստվածություն: Թեժ պայքարի ընթացքում նրանց հետ հուզվում էին նաև մարզիչները: Ակնհայտ էր, որ յուրաքանչյուր թիմ ցանկանում էր  հաղթող ճանաչվել:

Մրցանակային հանձնաժողովի գնահատականներով առաջին տեղն զբաղեցրեց Իվանյանի Օնիկ Գրիգորյանի անվան միջանակարգ դպրոցի թիմը, իսկ երկրորդ և երրորդ տեղերը՝ Ասկերանի Էդմոն Բարսեղյանի անվան և Այգեստանի Խաչատուր Աբովյանի անվան միջնակարգ դպրոցների թիմերը:

Հաղթող թիմերն արժանացան Ասկերանի շրջվարչակազմի աշխատակազմի կրթության և սպորտի բաժնի պատվոգրերի, իսկ Իվանյանի դպրոցի թիմն ստացավ նաև դրամական պարգև:

Դե ինչ, Իվանյանի թիմին մաղթենք հաջողություններ հանրապետական փուլում, որը կկայանա մարտի 18-ից 21-ը: Հուսանք, որ կկարողանան պատվով ներկայացնել Ասկերանի շրջանը:

Կարինե ԲԱԽՇԻՅԱՆ